މި ސީޒަންގައި ކޯޗުކަންކޮށްދޭނެ ޓީމެއް ނެތުމަކީ ވަރަށް ހިތްދަތި އިހުސާސެއްކުރަކަމެއްކަމަށް މަޝްހޫރު ކޯޗު ޚޯސޭ މޮރީނިއޯ ބުނެފިއެވެ.
ދުނިޔޭގެ އެންމެ މޮޅު ކޯޗުގެ މަގާމްވެސް މީގެ ކުރިން ހޯދާފައިވާ ކޯޗު އެންމެ ފަހުން އިރުޝާދުދިނީ އިނގިރޭސި ކުލަބު މެންޗެސްޓަރ ޔުނައިޓެޑަށެވެ. އޭނާ އެކުލަބުގެ ކޯޗުގެ މަގާމުން ވަކިކުރީ މިދިޔަ އަހަރުގެ ޑިސެމްބަރުމަހުގައެވެ.
މި ސީޒަނަކީ 2000ވަނަ އަހަރު ކޯޗިންގެ ތެރެއަށް މޮރީނިއޯ ނިކުތްފަހުން އޭނާ އިރުޝާދުދޭނެ ކުލަބެއް ނެތި ފެށި ފުރަތަމަ ސީޒަންކަން ފާހަގަކޮށްލެވެއެވެ. މޮރީނިއޯ ބުނީ ސީޒަން ފެށިއިރު އިރުޝާދުދޭނެ ކުލަބެއް ނެތުމަކީ ވަރަށް ހިތްދަތިވާކަމެއްކަމަށެވެ. އަދި މިއީ އޭނާގެ ކޯޗިންގ ކެރިއަރުގައި އެންމެ ހިތާމަވެރި ދުވަސްތައްކަމަށް އޭނާ ބުނިއެވެ. މޮރީނިއޯ މިހާރު މަސައްކަތްކުރަނީ ސްކައި ސްޕޯޓްސްގެ ޓީވީ އެނަލިސްޓެއްގެ ގޮތުގައެވެ.
މޮރީނިއޯ ބުނީ ފުޓްބޯޅައާއި ދުރުގައި ހުންނަން އެއްގޮތަކަށްވެސް ބޭނުންނުވާކަމަށާއި، އެކަމަކު ޓީމެއްގެ ބެންޗުގައި ނީނދެވުމަކީ ވަރަށް ދެރަވާކަމެއްކަމަށެވެ.
މޮރީނިއޯވަނީ ޕޯރތޯ، ޗެލްސީ، އިންޓަރ މިލާން، ރެއާލް މެޑްރިޑް އަދި މެންޗެސްޓަރ ޔުނައިޓެޑްގައިވެސް ކާމިޔާބީތައް ހޯދާފައެވެ. މޮރީނިއޯ ބުނީ އޭނާ ފެނުން އެންމެ ބޮޑަށް ގާތީ ކުލަބަކަށްވުރެ ޤައުމީ ޓީމަކުންކަމަށެވެ.