ސަރުކާރުގެ ހުރިހާ ސިޔާސަތުތަކެއް ތަންފީޒްކުރާނީ ޒަމާނީ ތަޢުލީމް އުނގަންނައިދީގެން، ހެޔޮލަފާ ދުޅަހެޔޮ އުފެއްދުންތެރި ޒުވާނުން ބިނާކުރުމަށްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި، ރާއްޖޭގެ ރައްޔިތުންނަށް ފޮނުއްވި ތަހުނިޔާގެ ޚިޠާބުގައެވެ. ރައީސުލްޖުމްހޫރިއްޔާގެ ޚިޠާބުގައިވަނީ ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި، ރާއްޖޭގެ ލޮބުވެތި ޒުވާނުންނަށާއި ހެޔޮ ގޮތުގައި ޒުވާނުން ބިނާކޮށް، ޒުވާނުންގެ ކުރިއެރުމާއި ތަރައްޤީއަށް މަސައްކަތްކުރައްވާ ހުރިހާ ބޭފުޅުންނަށް ވެސް ދުވަހުގެ ހެޔޮއެދުމާއި ތަހުނިޔާ ފޮނުއްވާފައެވެ.
އިންސާނީ ކޮންމެ މުޖްތަމަޢަކަށްވެސް ޒުވާނުންގެ ބޭނުންޖެހިފައިވާ މިންވަރުގެ މައްޗަށް އަލިއަޅުއްވާލައްވައި ރައީސް ވިދާޅުވީ ޒުވާނުންނާ ނުލައި އެއްވެސް މުޖްތަމަޢެއް ކުރިނާރާނެކަމަށެވެ. ކޮންމެ ޤައުމެއްގައި ވެސް އެންމެ ހަރުއަޑުން އަބަދުވެސް ދެކެވެނީ ހެޔޮލަފާ ޒުވާން ޖީލެއް ބިނާކުރުމުގެ ވާހަކައާއި ޒުވާނުން ހެޔޮ ގޮތުގައި ތަރުބިއްޔަތު ކުރުމުގެ މުހިންމުކަމުގެ ވާހަކައާއި ޤައުމު އާރާސްތުކުރުމުގައި ޒުވާނުންގެ ދައުރު ފުޅާކުރުމުގެ ވާހަކަކަން ރައީސް ފާހަގަކުރެއްވިއެވެ. މިއިން އެނގެނީ އިންސާނީ ކޮންމެ މުޖްތަމަޢަކަށް ޒުވާނުންގެ ބޭނުންޖެހިފައިވާ މިންވަރުކަމަށާ، ޒުވާނުންނާ ނުލައި އެއްވެސް މުޖްތަމަޢެއް ކުރިނާރާނެކަމަށްވެސް އެމަނިކުފާނު ވިދާޅުވިއެވެ.
ޒުވާނުންނަކީ ޤައުމަށް ހެވާއިލާބައަށް މަސައްކަތްކުރާ ބަޔަކަށް ހެދޭނީ ޒުވާނުން ބިނާކުރުމަށް އިސްކަން ދީގެންކަމަށް އެމަނިކުފާނު ވިދާޅުވިއެވެ. އަދި ޤައުމަށް ބޭނުންވަނީ ޒަމާނީ ތަޢުލީމީ އުފެއްދުންތެރި އައު އީޖާދުތަކަށް ފިކުރުހިންގާ ޒުވާނުންތަކެއްކަމަށާ، ރިވެތި އަޚްލާޤާއި އިޖްތިމާޢީ ރީތި އަދަބުތަކުގެ މަތީގައި ތަރުބިއްޔަތުވެފައިވާ ޒިންމާދާރު ޒުވާނުންކަމަށްވެސް ރައީސްގެ ޚިޠާބުގައި ވިދާޅުވިއެވެ. ޒުވާނުންނަކީ އިސްލާމް ދީނުގެ ޞައްޙަ ޢަޤީދާގެ މަތީގައި ސާބިތުވެ ތިބި، ޤައުމަށް ވަފާތެރި ތެދުވެރި ބަޔަކަށް ވާންޖެހޭކަން އެމަނިކުފާނު ފާހަގަކުރެއްވިއެވެ.
"މި އަހަރުގެ ޒުވާނުންގެ ދުވަހަށް އދ.މަޖިލީހުން ކަނޑައަޅާފައިވާ ޝިޢާރުގެ އަމާޒަކީ، އެކަކުވެސް ބާކީނުކޮށް އެންމެން ޝާމިލްވާ، ހަމަހަމަ ފުރުޞަތު ލިބިދޭ، ފެންވަރު ރަނގަޅު ތަޢުލީމެއް ކަށަވަރު ކޮށްދިނުން. ހަމައެއާ އެކު، ޙަޔާތުގެ ހުރިހާ ޢުމުރު ފުރާއެއްގައި ތަޢުލީމް ޙާޞިލްކުރުމުގެ ފުރުޞަތު، އެންމެންނަށް ފަހިކޮށްދިނުމެވެ. އެއީ، އދ.މަޖިލީހުން ކަނޑައަޅާފައިވާ، ދެމެހެއްޓެނިވި ތަރައްޤީގެ 2030ގެ އެޖެންޑާގެ ބިންގަލަކީ، ފެންވަރު ރަނގަޅު ތަޢުލީމް ކަމަށްވާތީ." ރައީސްގެ ޚިޠާބުގައި ވިދާޅުވެފައިވޭ.
މީގެއިތުރުން، ސަރުކާރުގެ އެންމެ ބޮޑު އަމާޒަކީ، ޒަމާނީ ތަޢުލީމު އުނގަންނައިދީގެން ހެޔޮލަފާ ދުޅަހެޔޮ އުފެއްދުންތެރި ޒުވާން ޖީލެއް ބިނާކުރުންކަމަށް ރައީސް ވިދާޅުވިއެވެ. އަދި ޒަމާނީ ތަޢުލީމާއި ތަމްރީން ލިބިގެން އަމިއްލަ އަތުން ދިރިއުޅުން ބިނާކުރާ ޒިންމާދާރު ޒުވާނުންތަކެއް އުފެއްދުންކަމަށް ސަރުކާރުން މަސައްކަތްކުރައްވާކަން އެމަނިކުފާނު ފާހަގަކުރެއްވިއެވެ. ސަރުކާރުގެ ހުރިހާ ސިޔާސަތުތަކެއް ތަންފީޒުކުރަމުން ދާނީ މި ލަނޑުދަނޑި ޙާޞިލްކުރެވޭނެ މަގުންކަމަށާ، އެކަމުގެ ބޭނުމަކީ ޤައުމާއިގެން ކުރިއަށް ދިޔުމުގެ ރޫޙާއި ވަޠަނީ ލޯބި ހުރި، ޢަދުލު އިންޞާފަށް ވަކާލާތުކުރާ ޖީލެއްގެ އަތްމައްޗަށް ޤައުމުގެ ކުރިމަގު ފުރޮޅިގެން ދިޔުމަށް މަގުފަހުކުރުން ކަމުގައި ރައީސުލްޖުމްހޫރިއްޔާގެ ޚިޠާބުގައި ވިދާޅުވެފައިވެއެވެ.