މާލެއަކީ ސާފު ރީތި ތަނެއްގެގޮތުގައި ބޭއްވޭނީ އެންމެންގެ ޒިންމާވެސް އަދާކޮށްގެންކަމަށް މާލެ ސިޓީގެ މޭޔަރު ސިފާ މުޙައްމަދު ވިދާޅުވެއްޖެއެވެ.
މާލެއަކީ ސާފް ރީތި ތަނެއްގެ ގޮތުގައި ބޭއްވުމަށް މާލެ ސިޓީ ކައުންސިލާއި ވެމްކޯ ގުޅިގެން މާލެ ސާފުކުރުމުގެ އެކި ހަރަކާތްތައް ދަނީ ހިންގަމުންނެވެ. މާލެއަކީ ވެރިކަންކުރާ ސިޓީގެ އިތުރުން އެންމެގިނަބަޔަކު ދިރިއުޅެމުންދާ ތަނަށްވާއިރު، މާލެއަށް ޒިޔާރަތްކުރާ ފަރާތްތަކަށާއި، ދިރިއުޅޭ މީހުންނަށްވެސް ސާފު، ރީތި ތަނަކަށް މިތަން ވުމަކީ އެންމެންނަށްވެސް ލިބޭނެ އުފަލެކެވެ. މާލޭގެ ރީތިކަން ދެމެހެއްޓުމަށް އެންމެ ބުރަމަސައްކަތްތަކެއް ކުރަމުންދަނީ ވެމްކޯގެ ހީވާގި ކަނބަލުންނެވެ. ރޭގަނޑުގެ ނިދިނަގާލުމަށްފަހު ކޮންމެރެއަކު މުޅި މާލެތެރެ ސާފުކުރުމަށް އެކަނބަލުންކުރާ މަސައްކަތަކީ މާލޭގައި ދިރިއުޅޭ އެތައްބަޔަކަށް އެކަމުން އުފާވެރިކަން ގެނެސްދޭކަމެކެވެ.
ނަމަވެސް ކޮންމެރެއަކު އެކަނބަލުން އެކުރާ ބުރަމަސައްކަތާމެދު މާލޭގައި ދިރިއުޅޭ ކޮންމެ މީހަކުވެސް ފުންކޮށް ވިސްނައިފިނަމަ މަގުމައްޗަށް އަޅާކުނީގެ ނިސްބަތް މަދުކުރެވޭނެކަން ޔަޤީނެވެ. ކޮންމެރެއަކު ދަންވަރު 11 އިން ފަތިހު 5 ޖަހަންދެން މާލޭގެ މަގުމަތި ސާފުކުރުމަށް ވެމްކޯގެ ކަނބަލުން ކުރާ މަސައްކަތުން ދުވާލަކަށް ގެނޭ ކުނީގެ ޢަދަދު މަދުނުވާކަމީ އެކަނބަލުންގެ އެންމެބޮޑު ކަންބޮޑުވުމެވެ.
މާލޭގެ 5 ސަރަހައްދަކަށް ބަހާލައިގެން މުޅި މާލެތެރެ ކޮންމެ ރެއަކުވެސް ސާފުކުރުމުގެ މަސައްކަތް ކުރިއަށްދާއިރު ކޮންމެ ގުރޫޕަކުންވެސް މެދުވެގެން 30 ކޮތަޅާއި 40 ކޮތަޅާއި ދޭތެރޭ ކުނި މަގުތަކުން ނަގައެވެ. މީގެ ތެރޭގައި އެންމެ ގިނަޢަދަދަކަށް ކޮންމެ ދުވަހަކުވެސް މަގުތަކުތަކުގައި ހުންނަނީ ސިގިރޭޓް ފިލްޓަރާއި ސްޕާރީ ހުސްކުރި ޕެކެޓާއި ފުޅިއާއި ދަޅުކަމަށް ވެމްކޯއިން ވިދާޅުވެއެވެ. ކާނުތަކުގެ ތެރޭގައާއި ޕާކުކޮށްފައި ހުންނަ ސައިކަލުތަކުގެ ދޭތެރެއަށް ކުނިތައް ސާފްކުރުމުގެ ތެރޭގައި އެކިވަރުގެ އަނިޔާތައް ވެފައިހުންނާނެކަމަށް އެބޭފުޅުން ފާހަގަކޮށްފައިވެއެވެ.
މިހަފްތާއަކީ އީދުބަންދުގެ ހަފްތާއަށްވެފައި މާލެއަށް ޒިޔާރަތްކުރާ ފަރާތްތަކަށާއި، މާލޭގައި އުޅޭމީހުންނަށް، މާލެއަކީ ސާފު ރީތިތަނެއްގެ ގޮތުގައި ބޭއްވުމަށް މާލޭގައި ދިރިއުޅޭ ރައްޔިތުންނަށް މާލޭގެ މޭޔަރު ސިފާ މުޙައްމަދުވެސްވަނީ އިލްތިމާސްކުރައްވާފައެވެ. ސިފާ ވިދާޅުވީ ސާފު ރީތި ތަނެއްގެ ގޮތުގައި މާލެ، ބޭއްވުމަކީ އެންމެންގެ ޒިންމާއަކަށް ވާންޖެހޭކަމަށެވެ. ހޮޓާ ރެސްޓޯރެންޓުތަކާއި ކޮންސްޓްރެކްޝަން ސައިޓްތަކުގެ ބޭރުގައި ކުނިތައް ފުންޏަކަށް ޖަހާފައި ނުބަހައްޓައި ދުވަހުންދުވަހަށް ކުނިތައް ސާފްކުރަންޖެހޭކަމަށްވެސް އޭނާ ވިދާޅުވިއެވެ. މިގޮތަށް އަމަލު ނުކުރާ ފަރާތްތަކާމެދު ސިޓީ ކައުންސިލުން ފިޔަވަޅު އަޅާނެކަމަށްވެސް ސިފާ ވިދާޅުވިއެވެ.
ވެމްކޯގެ ކަނބަލުން ކޮންމެ ރެއަކު މާލެތެރެ ސާފުކުރުމަށް ކުރާ މަސައްކަތުގައި މާލެއިން 400 އަށްވުރެ ގިނަ ކޮތަޅުގެ ކުނި ނަގައެވެ. ވެމްކޯގެ ކުނި ލޮރީތަކުން ކޮންމެ ދުވަހަކުވެސް 19 ހާހަށްވުރެ ގިނަ ގެއިން ކުނި ނަގާއިރު ވިޔަފާރިކުރާ ތަންނަތަނާއި ސަރުކާރުގެ މުއައްސަސާތަކާއި ކެފޭ ރެސްޓޯރެންޓްތަކުން ސޯޅަ ސަތޭކައަށްވުރެ ގިނަ ތަންތަނުން ކޮންމެ ދުވަހަކުވެސް ވެމްކޯއިން ކުނި ނަގާކަން ފާހަގަކޮށްލެވެއެވެ. މާލެތެރެ ސާފު ރީތި ތަނެއްގެ ގޮތުގައި ބޭއްވުމަކީ ހަމައެކަނި ވެމްކޯއަށް ނުވަތަ މާލޭ ސިޓީ ކައުންސިލަށް ދޫކޮށްލައިގެން ވާން އޮތްކަމެއް ނޫނެވެ. މިއީ ކޮންމެ މީހެއްގެވެސް ފަރުދީ ޒިންމާއެއްކަމުގައި ދެކެންޖެހެއެވެ.