އަޟްޙާ ޢީދުގެ އުފާ މުޅިރާއްޖޭގައި ކުލަގަދަކޮށް ފާހަގަކުރަމުންދާއިރު، ޢީދުގެ ތަހުނިޔާގެ އުފާވެރި މެސެޖްތައް ދައުލަތުގެ އެކިފަންތީގެ ބޭފުޅުން ދަނީ ރައްޔިތުންނަށް އަރިސްކުރަމުންނެވެ.
އަޟްޙާ ޢީދަކީ ދިވެހިންގެ މެދުގައި އެންމެ އުފާވެރި އަދި އެންމެ ކުލަގަދަކޮށް ފާހަގަކުރާ ޢީދުގެ ގޮތުގައި ޒަމާނުއްސުރެއް އޮންނަނީވެފައެވެ. އެހެން އަހަރުތަކާ ޚިލާފަށް މިއަހަރުގެ ޢީދުގެ އުފާވެރިކަން އައިސްފައިވަނީ ވަރަށްވެސް ތާރީޚީ އަދި އެހާމެ މުނާސަބުގޮތަކަށެވެ.
ހުކުރު ދުވަހުގެ ޚުތުބާއާއި ޙައްޖު ދުވަހުގެ ޚުތުބާއާއި ޢީދުދުވަހުގެ ޚުތުބާ ޖެހިޖެހިގެން 3 ދުވަހެއްގައި އައިސްފައިވާކަމީ މުސްލިމުންގެ ހިތްތަކުގައި މި ތާރީޚީ މުނާސަބާ ފާހަގަކުރެވިގެންދާނެ ކަމެކެވެ. އަޟުޙާ ޢީދުގެ އުފާ މުޅި ރާއްޖޭގެ އެކި ކަންކޮޅުތަކުގައި ކުލަގަދަކޮށް ފާހަގަކުރަމުންދާއިރު ދުވަހުގެ ތަހުނިޔާ ދައުލަތުގެ ވެރިންނާއި މުއައްސާތަކާއި ޢާންމު ފަރުދުންވެސް އެކި ވަޞީލަތްތަކުގެ ޒަރިއްޠާއިން ދަނީ ފޮނުއްވަމުންނެވެ.
އަޟުޙާ އީދުގެ ތަހުނިޔާ ރާއްޖޭގެ ރައްޔިތުންނަށް އަރިސްކޮށް ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކުރައްވާފައިވާ ޓްވީޓުގައި ވިދާޅުވެފައިވަނީ މިފަދަ އުފާވެރި މުނާސަބަތުތައް މާތްﷲ މިއުއްމަތަށް ތަކުރާރުކުރައްވައި ރައްޔިތުންގެ މެދުގައި އެކުވެރިކަމާއި ސުލްޙަވެރިކަން ދެމެހެއްޓުމަށް ދުޢާކުރައްވާފައެވެ.
ކުރީގެ ރައީސުލްޖުމްހޫރިއްޔާ އަލްއުސްތާޛޫ މައުމޫން ޢަބްދުލްޤައްޔޫމް ފޮނުއްވާފައިވާ ތަހުނިޔާގެ މެސެޖުގައިވަނީ އަޟުޙާ ޢީދު ދުވަހަކީ އެކުވެރިކަމާއި އެއްބައިވަންތަކަން އިތުރަށް އާލާކޮށް ދިރުވުމުގެ ދުވަސްކަމުގައެވެ. ޚާއްސަކޮށް މުސްލިމުންގެ ތެރޭގައިތިބި ފުދުންތެރިކަން ކުޑަ އަޚުންނާއި އުޙުތުންގެ ޙާލުބަލައި އެފަދަ މީހުންނަށާއި ޢާއިލާތަކަށް، ވެދެވެންއޮތް އެހީތެރިކަމެއް ވެދިނުމުގެ ދުވަހުގެ ގޮތުގައިކަމަށެވެ.
އަޟުޚާއީދުގެ ތަހުނިޔާ ރައްޔިތުންގެ މަޖިލީހުގެ ރައީސް، އަދި ކުރީގެ ރައީސުލް ޖުމްހޫރިއްޔާ މުހައްމަދު ނަޝީދުވެސްވަނީ ރާއްޖޭގެ ރައްޔިތުންނަށް އަރިސްކުރައްވާފައެވެ. އަޟުޙާ ޢީދުގެ ތަހުނިޔާގެ މެސެޖްތަކާއި އަޑުތަކުން އުފާވެރިކަން ލިބޭ މިދަނޑިވަޅުގައި ދައުލަތުގެ ވަޒީރުންނާއި، ރައްޔިތުންގެ މަޖިލީހުގެ މެމްބަރުންނާއި މިނިވަން މުވައްސާތަކާއި ދައުލަތުގެ ޢިއްޒަތްތެރިންވެސް ދަނީ ދުވަހުގެ ތަހުނިޔާ ރާއްޖޭގެ ރައްޔިތުންނަށް އަރިސްކުރަމުންނެވެ.
އަޟުޙާ ޢީދުގެ އުފާވެރި ހަރަކާތްތައް ރާއްޖޭގެ އެކިކަންކޮޅުތަކުގައި ވަރަށް ކުލަގަދަކޮށް ދަނީ ފާހަގަކުރަމުންނެވެ. ޢީދުގެ އުފާފާޅުކުރުމަށް ބޮޑު ބަންދެއް ލިބިފައިވާއިރު، އީދުބަންދައްފަހު ސަރުކާރު ހުޅުވޭނީ މިމަހުގެ 18ވަނަ ދުވަހުއެވެ.