ވީނުވީއެއްނޭގި މީގެ 5 އަހަރުކުރިން ގެއްލިފައިވާ ނޫސްވެރިޔާ އަޙުމަދު ރިޟުވާން ޢަބްދުﷲ ގެއްލުނުތާ ފަސްއަހަރު ފާއިތުވެފައިވާއިރު އޭނާ ގެއްލުވާލިކަމަށް ތުހުމަތުކުރެވޭ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ޙުކުމް ކޮށްފައިވަނީ މީގެ އަހަރެއްހާ ދުވަހުގެ ކުރިންނެވެ. މިފަރާތްތަކުގެ މައްޗަށް ކުށް ސާބިތު ނުވާކަމަށް ކުރި ހުކުމް މިއަދާހަމައަށްވެސް އިސްތިއުނާފުގެ މަރުހަލާ ހައި ކޯޓުގައި ފަށާފައި ނުވެއެވެ.
ރިޟުވާނުގެ މައްސަލަ އިސްތިއުނާފުކޮށްފައިނުވާ މައްސަލާގައި އިއްޔެ ހައިކޯޓުންވަނީ އޭނާގެ ޢާއިލާއަށް މިކަމާ ގުޅޭގޮތުން ލިޔުމުން ޖަވާބުދެއްވާފައެވެ. ކޯޓުގެ ޖަވާބާއެކު ޕީޖީ ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި މިކަމާއި ގުޅޭގޮތުން ދެއްކެވި ވާހަކަތަކާއިނެދު ސުވާލު އުފެދިގެންދިޔައެވެ.
މިމައްސަލާގައި މިދިޔަ މަހުގެ 22ވަނަ ދުވަހު ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ޕްރޮސެކިއުޓާ ޖެނެރަލް ޢާއިޝަތު ބިޝާމް ޙާޒިރުކޮށް ރިޟުވާނު ގެއްލުވާލި މައްސަލައިގެ ޙުކުމް އިސްތިއުނާފު ކޮށްފައިވާނެތޯ މެމްބަރަކު ކުރެއްވި ސުވާލަށް ޖަވާބު ދެއްވަމުން ޕީޖީ ބިޝާމް ވަނީ އެމައްސަލަ އިސްތިއުނާފު ކުރުމުގެ ހުއްދައަށް އެދިފައިވާނެކަމަށް ވިދާޅުވެފައެވެ.
ޕީޖީ އޮފީހުންވަނީ މިމައްސަލަ ކޯޓްގައި އިސްތިއުނާފްކޮށްފައިވާ ތާރީޚު ތަކާއިއެކު ރޭ ޓްވީޓް ކުރައްވާފައެވެ.
މިމައްސަލާގައި ކްރިމިނަލް ކޯޓުން ހުކުމްކޮށްފައިވަނީ 2 އޯގަސްޓް 2018 ގައި ކަމަށާއި، ހައިކޯޓްގައި ޕީޖީގެ ފަރާތުން ހުއްދައަށް އެދިފައިވާނީ ހަމަ އެދުވަހުގައިކަމަށް ޕީޖީ އޮފީހުން ވިދާޅުވެއެވެ.
އަދި ސިޓީގެ ޖަވާބު 6 އޯގަސްޓް 2018 ގައި ލިބިފައިވާކަމށްވެސް ޕީޖީ އޮފީހުން ރޭ ދަންވަރު ކުރެއްވި ޓްވީޓްގައި ވިދާޅުވެފައިވެއެވެ. ރިޟުވާނު ގަދަކަމުން ފޮރުވިކަމަށްބުނެ ދައުލަތުން ޓެރަރިޒަމްގެ ދައުވާކުރީ ހ.ހިލްޓަން އާލިފް ރައޫފާއި ގދ.ވާދޫ ކަރަންކާގޭ މުޙައްމަދު ނޫރައްދީނުގެ މައްޗަށެވެ.
ނޫސްވެރިޔާ އަޙްމަދު ރިޟުވާން ޢަބްދުﷲ ރަހީނުކުރުމުގެ އަޑީގައި ތިބީ "ޓެރަރިސްޓް ގްރޫޕެއް" ކަމަށާއި ދަޢުވާ ކުރެވޭ މިންވަރަށް ހެއްކާއެކު އެއީ ކޮންބައެއްކަން ހޯދިފައިވާކަމަށް ގެއްލުވާލާފައިވާ މީހުންނާއި، ގޮތް ނޭނގޭގޮތަށް މާރާލެވިފައިވާ މީހުންގެ މައްސަލަތައް ބަލައި ރިޔާސީ ކޮމިޝަނުގެ ރައީސް ޙުސްނުއްސުޢޫދުވެސް ވަނީ އިއްޔެ ވިދާޅުވެފައެވެ.
ރިޟުވާނުގެ މައްސަލާގައި އެއްވެސް ކުރިއެރުމެއް ލިބިފައިނުވާ މައްސަލާގައި އޭނާގެ ޢާއިލާން މިދިޔަ 5 އަހަރުވަނީ މިމައްސަލައިގެ އިންސާފް ހޯދަން ވަރަށްގިނަ މަސައްކަތްތަކެއްކޮށްފައެވެ. ނަމަވެސް ރިޟުވާން ގެއްލުނުތާ 5 އަހަރުވެގެންދިޔަ އިރުވެސް މިކަމުގެ މާބޮޑު ތަފްސީލެއް ކަމާބެހޭ އެއްވެސް ފަރާތަކުން ހާމަކޮށްފައިނުވެއެވެ.