ޙައްޖުގެ މަތިވެރި އަޅުކަން އަދާކުރުމަށް މައްކާއަށް ގޮސްތިބި ދިވެހި ޙައްޖުވެރިންނާ، ރާއްޖޭގެ މިއހަރުގެ އަމީރުލް ޙައްޖު ޕްލޭނިން މިނިސްޓަރ މުޙައްމަދު އަސްލަމް ބައްދަލުކުރައްވައިފިއެވެ.
މިނިސްޓަރ އަސްލަމްވަނީ މިއަހަރު ރާއްޖެއިން އެކި ޖަމާޢަތްތަކުގެ ޙަވާލުގައި ހައްޖަށްދިޔަ މީހުން ތިބިތަންތަނަށް ޒިޔާރަތްކުރައްވައި އެމީހުންގެ ޙާލު ބައްލަވާލައްވާފައެވެ. އެގޮތުން މިއަހަރު ރާއްޖެއިން ހައްޖަށް ގެންދިޔުމުގެ ހުއްދަދީފައިވާ 6 ޖަމާއަތުގެ ހަވާލުގައި ހައްޖަށް ދިޔަ މީހުންނާ މިނިސްޓަރ ބައްދަލުކުރެއްވިއެވެ.
ކޮންމެ އަހަރަކުވެސް ދިވެހި ޙައްޖުވެރިންގެ ކަންކަމާ ޙަވާލުވެވަޑައިގަންނަވާނެ ދައުލަތުގެ އިސް މަސްއޫލްވެރިޔަކު ރައީސުލްޖުމްހޫރިއްޔާ ކަނޑައަޅުއްވައި، ސަޢޫދީ ޢަރަބިއްޔާއަށް ފޮނުއްވައެވެ. މިގޮތުން މިއަހަރުގެ އަމިރުލް ޙައްޖުގެ ގޮތުގައި ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިހް ހަމަޖައްސަވާފައިވަނީ މިނިސްޓަރ އޮފް ޕްލޭނިން އެންޑް އިންފްރަސްޓްރަކްޗަރ މުޙައްމަދު އަސްލަމެވެ. ހައްޖުގެ އަޅުކަމަށް އެމަނިކުފާނު ފުރާވަޑައިގަންނަވާފައިވަނީ މިމަހުގެ 5ވަނަ ދުވަހުގެރެއެވެ.
މިއހަރު ރާއްޖެއިން މީހުން ހައްޖަށް ގެންދަން ލިބުނު 2000 ކޯޓާގައި މީހުންވަނީ ގޮސްފައެވެ. އަދި މިއަހަރު ރާއްޖެއިން ޙައްޖަށް ގޮސްފައިވާ ހުރިހާ ހައްޖުވެރިންގެ ހާލުވެސް ރަނަގޅުކަަމަށް ޚަބަރުލިބެއެވެ. މިއހަރު ރާއްޖެއިން ހައްޖަށް މީހުން ގެންދިޔުމުގެ ހުއްދަ ޙައްޖު ކޯޕަރޭޝަނާއެކު 6 ޖަމާއަތަކަށް ވަނީ ދިފައެވެ.