އިނގިރޭސިވިލާތުގެ ވިސާ އެޕްލިކޭޝަނަށް އެދުމަށް ހުޅުވާލި ފުރުޞަތުގައި 67 ފަރާތަކުން ވިސާއަށް އެދިފައިވާކަމަށް ފޮރިން މިނިސްޓްރީން ވިދާޅުވެއްޖެއެވެ.
ފޮރިން މިނިސްޓްރީން ވިދާޅުވީ އެ މިނިސްޓްރީގައި ހުޅުވި އިނގިރޭސިވިލާތުގެ ވަގުތީ ވިސާ އެޕްލިކޭޝަން ސެންޓަރުން ޚިދުމަތް ދިނުމަށް މިމަހުގެ 5 ވަނަ ދުވަހާއި 6 ވަނަ ދުވަސް ކަނޑައެޅިނަމަވެސް ތަރުހީބަށް ބަލައި މިއަދުވެސް އެ ސެންޓަރުން ޚިދުމަތް ދީފައިވާކަމަށެވެ. އަދި މިއަދު ހަވީރު އެ ސެންޓަރު ބަންދުކުރުމާ ހަމައަށް 67 ފަރާތަކަށް ވިސާ ދޫކޮށްފައިވާކަމަށާ އެއީ މިދިޔަ އަހަރާ އަޅާބަލާއިރު 6 މީހުންގެ އިތުރުވުމެއްކަމަށެވެ.
ފޮރިން މިނިސްޓްރީގައި އިނގިރޭސިވިލާތުގެ ސަރުކާރުން ވަގުތީ ވިސާ އެޕްލިކޭޝަން ސެންޓަރެއް ހުޅުވައި ދެއްވީ އެޤައުމަށް ދަތުރުކުރާ ދިވެހިންނަށް، ހާއްސަކޮށް ކިޔަވާ ކުދިންނަށް ސްޓޫޑެންޓް ވިސާ ހޯދުމަށް ދިމާވާ ދަތިތަކަށް ހައްލެއް ހޯދައި ދިނުމަށް ދިވެހި ސަރުކާރުން އެދިފައިވާތީއެވެ. މިއީ ދިވެހިރައްޔިތުންނަށް ފޯރުކޮށްދޭ ކޮންސިއުލަރ ޚިދުމަތްތައް ފުޅާކޮށް، އިތުރަށް ހަރުދަނާކުރުމަށް ސަރުކާރުން ކުރައްވާ މަސައްކަތުގެ ތެރެއިން ކުރެވުނު ކަމެއްކަމަށް ފޮރިން މިނިސްޓްރީން ވިދާޅުވެއެވެ.
ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމާއި ހަވާލުވެ ވަޑައިގެންނެވުމަށްފަހު ބޭރުގެ ޤައުމުތަކުގައި ކިޔަވަމުންދާ ކުދިންނަށާއި، ދިރިއުޅެމުންދާ ފަރާތްތަކަށް ދިމާވާ ވިސާގެ މައްސަލަ ހައްލުކޮށްދެއްވުމަށް ގިނަ މަަސައްކަތްތަކެއް ދަނީ ކުރަމުންނެވެ.