ކަޝްމީރު މައްސަލާގައި އިންޑިޔާގެ ޤާނޫނު އަސާސީއަށް ގެނައި ބަދަލަކީ އެޤައުމުގެ އެތެރޭގެ ކަމެއް - ދިވެހި ސަރުކާރު

ކަޝްމީރުގެ މައްސަލާގައި އިންޑިޔާގެ ޤާނޫނު އަސާސީއަށް ގެނައި ބަދަލަކީ އެޤައުމަށް ލިބިގެންވާ ހައްގެއްކަމަށާ، އެއީ އިންޑިއާގެ އެތެރޭގެ މައްސަލައެއްކމަސް ދެކޭކަމަށް ދިވެހި ސަރުކާރުން ވިދާޅުވެއްޖެއެވެ.

ކަޝްމީރުގެ މައްސަލާގައި ރާއްޖޭގެ ފޮރިން މިނިސްޓްރީން ނެރެފައިވާ ކުރު ސްޓޭޓް މަންޓުގައިވަނީ ކޮންމެ ޤައުމެއްގެ ޤާނޫނު އަސާސީއަށްވެސް ބަދަލުކުރުމުގެ ހައްޤު އެޤައުމަކަށް ލިބިގެންވާކަމަށާ، އިންޑިޔާގެ ޤާނޫނުއަސާސީގެ ދަށުން ކަޝްމީރަކީ ޚާއްސަ އިމްތިޔާޒްތަކެއް ލިބިގެންވާ ސްޓޭޓެއްކަމަށް އޮތްއޮތުން ބަދަލުކުރުމަކީ އެޤައުމުގެ އެތެރޭގެ ކަމެއްކަމަށެވެ. ކަޝްމީރަށް ޚާއްސަ އިމްތިޔާޒްތަކެއް ލިބިގެންވަނީ އިންޑިއާގެ ޤަނޫނު އަސާސީގެ 370ވަނަ މާއްދާގެ ދަށުންނެވެ. ނަމަވެސް ދާދިފަހުން ވަނީ މި މާއްދާ އުވާލާފައެވެ. މިމާއްދާ އުވާލުމުން ކަޝްމީރުގައި އުފެދިދާނެ ހަމަނުޖެހުމަކަށްޓަކައި އިންޑިޔާގެ ސިފައިން ކަޝްމީރުގައި ސަލާމަތީ ކަންކަން ވަނީ ވަރުގަދަކޮފައެވެ.

ކަޝްމީރުގެ މައްސަލަޔަކީ އިންޑިޔާއާއި، ޕާކިސްތާނާއި ދެމެދު ނުތަނަވަސްކަން އުފެދިފައިވާ ޒަމާންވީ މައްސަލައެކެވެ. ކަޝްމީރުގެ މައްސަލާގައި 1947 ވަނަ އަހަރުގެ ފަހުން އިންޑިއާއާއި ޕާކިސްތާނުން 3 ހަގުރާމައެއް ކޮށްފައިވެއެވެ. އދ.އިންވެސް ވަނީ މިމައްސަލަ ހައްލުކުރުމަށް އެކިފަހަރުމަތީން މަސައްކަތްކޮށްފައެވެ.

އަދި ކަޝްމީރުގައި އުފެދިފައިވާ މައްސަލަ ހައްލުކުރުމަށް ކަޝްމީރުގައި ދިރިއުޅޭ މީހުންގެ މެދުގައި ފެންނަނުފެންނަ ވޯޓެއް ނެގުމަށް ނިންމުމަށްވެސް އދ.ވަނީ ގޮވާލާފައެވެ. އެހެންނަމަވެސް މިހާތަނަށް އެފަދަ އެއްވެސް ކަމެއް ކޮށްފައިނުވާކަން ފާހަގަކޮށްލެވެއެވެ.