އެންޓި ކޮރަޕްޝަން ކޮމިޝަން (އޭސީސީ)އަށް ޢައްޔަން ކުރުމަށް ރައީސުލްޖުމްހޫރިއްޔާ މަޖިލީހަށް ފޮނުއްވި ނަންތަކުގެ ތެރެއިން ފަސް ފަރާތަކަށް މަޖިލީހުން ރުހުންދީފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވޯޓަށް އަހާފައިވަނީ ކޮމިޓީން މާކްސްދީފައިވާ ބޭފުޅުންނަށެވެ. މަޖިލިސް ތަޅުމުން އޭސީސީއަށް އައްޔަންކުރުމަށް ވޯޓްދެއްވާފައިވަނީ ކޮމިޓީގައި އެންމެ މަތިން މާކްސް ލިބުނު 4 ބޭފުޅުންގެ އިތުރުން ކޮމިޓީގައި 7 ވަނައަށް އެންމެ މަތިން މާކްސްލިބުނު ފަރާތަކެވެ.
އޭސީސީއަށް އައްޔަންކުރުމަށް މަޖިލީހުން ރުހުންދީފައިވާ ފަސްބޭފުޅުންގެ ތެރޭގައި ހިމެނެނީ ދަފްތަރު ނަމްބަރު 3366 އަލީ އަޝްރަފާއި، ދަފްތަރު ނަމްބަރު 3654 އިބްރާހިމް ޝަކީލާއި ގ.ވޮޑިނޮޅުގެ ފާތިމަތު އަނޫލާއާއި ސ.ހިތަދޫ ނެދުންގެ މަރިޔަމް ޝިއުނާގެ އިތުރުން ޅ.ހިންނަވަރު ރޯލްގޯލްގޭ އައިޝަތު އަބްދުﷲއެވެ. މިއަދު މަޖިލީހުން ރުހުންދީފައިވާ 5 ބޭފުޅުންގެ ތެރޭގައި 3 އަންހެން ބޭފުޅުން ހިމެނޭކަން ފާހަގަކޮށްލެވެއެވެ.
އެސީސީގައި މިހާރު ތިއްބެވި ފަސް މެމްބަރުންގެ މުއްދަތު ހަމަވާނީ އަންނަ ސެޕްޓެމްބަރު މަހުގެ 9 ވަނަ ދުވަހުއެވެ. މި މެމްބަރުން މަޤާމަށް އައްޔަންކުރީ 2014ވަނަ އަހަރުއެވެ.