ސިންގަޕޯރ ކޮންވެންޝަން އޮން މީޑިއޭޝަންގައި ދިވެހިރާއްޖެއިން ސޮއިކޮށްފިއެވެ.
މި މުޢާހަދާގައި ސޮއިކުރުމަށް ޤައުމުތަކަށް ހުޅުވާލުމަށް މިއަދު ސިންގަޕޫރުގައި ބޭއްވި ޚާއްޞަ ރަސްމިއްޔާތުގައި ދިވެހިރާއްޖެއިން މި މުޢާހަދާގައި ސޮއިކުރެއްވީ އެޓަރނީ ޖެނެރަލް އަލްއުސްތާޛު އިބްރާހީމް ރިފްޢަތުއެވެ.
މި މުޢާހަދާއަކީ މީޑިއޭޝަން މެދުވެރިކޮށް ނިންމާ ވިޔަފާރީގެ މައްސަލަތަކުން އުފެދޭ ބައިނަލްއަޤްވާމީ ސެޓްލްމަންޓް އެގްރީމަންޓުތައް، މުޢާހަދާގައި ބައިވެރިވާ ޤައުމުތަކުން ބަލައިގަނެ، އެ ޤައުމުތަކުގައި އެ އެއްބަސްވުންތައް ތަންފީޛުކުރުމުގައި ޤައުމުތަކުގެ މެދުގައި އެއް އުޞޫލުތަކަކާއި އިންތިޒާމްތަކެއް ޤާއިމުކުރުމަށް އެކުލަވާލެވިފައިވާ ބައިނަލްއަޤްވާމީ ޤާނޫނީ އޮނިގަނޑެކެވެ.
ރައްޔިތުންގެ މަޖިލީހުން އިއްޔެ ވަނީ އީޔޫގެ ސެޓްލްމަންޓް މީޑިއޭޝަން މުޢާހަދާއަށްވެސް ރުހުންދީފައެވެ. ރާއްޖޭގައި ބޭރުގެ އިންވެސްޓްމަންޓްތަކަށް ރައްކާތެރި މާޙައުލެއް ޤާއިމްކުރުމާއި، ކޯޓުން ބޭރުގައި މައްސަލަ ޙައްލުކުރުމުގެ ނިޒާމު ހަރުދަނާކުރުމަކީ ސަރުކާރުގެ އަމާޒެއް ކަމަށްވެސް އޭޖީއޮފީހުން ވިދާޅުވެއެވެ.
ސިންގަޕޯރ ކޮންވެންޝަން އޮން މީޑިއޭޝަންގައި ރާއްޖެއިން ސޮއިކުރިނަމަވެސް، މުޢާހަދާ ތަންފީޛުކުރުމަށްޓަކައި ކަމާބެހޭ ޤާނޫނެއް ބޭނުންވާތީ، އެ މަސައްކަތް އޭޖީ އޮފީހުން މިހާރު ފަށާފައިވާނެކަމާއި، އެ މުޢާހަދާ ތަންފީޛުކުރެވޭނީ އެ ޤާނޫނު ވުޖޫދަށް އައުމަށްފަހު، ފަހުގެ މަރުޙަލާއެއްގައި އެ މުޢާހަދާ ދިވެހިރާއްޖެއިން ތަޞްދީޤުކުރުމަށް ފަހުގައި ކަމަށްވެސް އޭޖީ އޮފީހުން ވިދާޅުވެއެވެ.