ށ.ކޮމަންޑޫ ބަނދަރު ހެދުމަށާއި ލ.މާބައިދޫ ބަނދަރުގެ ނެރު ހެދުމަށް އެމްޓީސީސީއާ ހަވަލުކޮށްފިއެވެ.
ޕްލޭނިން މިނިސްޓްރީގައި ބޭއްވި ރަސްމިއްޔާތެއްގައި މިމަޝްރޫއުތައް އެމްޓިސީސީއަށް ހަވާލުކުރުމުގެ އެއްބަސްވުމުގައި ޕްލޭނިން މިނިސްޓްރީން ސޮއިކުރެއްވީ ޑިރެކްޓަރ ޖެނެރަލް ފާޠިމަތު ޝާނާ ފާރޫޤްއެވެ. އަދި އެމްޓީސީސީގެ ޗީފް އޮޕަރޭޓީން އޮފިސަރ ޝާހިދު ޙުސައިން މޫސާއެވެ.
ށ.ކޮމަންޑޫ ބަނދަރު ހެދުމަށް އެމްޓިސީސީއަށް ހަވާލުކޮށްފައިވަނީ އެއްއަހަރު ދުވަހުގެ ތެރޭގައި މަސައްކަތް ނިންމުމަށެވެ. މި މަޝްރޫއުއަށް 29،412،392.94 ރުފިޔާ ޚަރަދުވެއެވެ. މި މަޝްރޫއުގެ ދަށުން 12 މީޓަރު ބޭރު ތޮށި ޖެހުމާއި 20 މީޓަރު ރިވެޓްމަންޓް ޖެހުމުގެ އިތުރުން 190 މީޓަރު އެއްގަމު ތޮށި ހެދުމަށް ވަނީ ހަމަޖެހިފައެވެ.
މީގެ އިތުރުން ބަނދަރުގެ ދިގުމިނާ ފުޅާމިނުގައި 11 މީޓަރުގެ ރޭމްޕެއް ހެދުމާއި އެއްގަމު ތޮށި ވަށައިގެން ޕޭވްމަންޓް ހެދުމާއި ބަނދަރު ފުންކުރުމާއި ބަނދަރުގެ ނެރު ފުން ކުރުމާއި 2 ނެރުބައްތި ޖެހުމާއި ބަނދަރު ސަރަހައްދުގައި 19 ލައިޓް ޖެހުން އަދި 10 މޫރިން ބްލޮކް ހަރުކުރުމަށްވެސް ވަނީ ހަމަޖެހިފައެވެ.
އެމްޓީސީސީއާ ދެން ހަވާލުކޮށްފައިވަނީ ލ. މާބައިދޫ ބަނދަރުގެ ނެރު ހެދުމަށެވެ. މިގޮތުން އެ ކުންފުންޏަށް މި މަސައްކަތް ކުރުމަށް ހަވާލުކޮށްފައިވަނީ 16،420،153.78 ރުފިޔާއަށް 120 ދުވަސްތެރޭ ނިންމާ ހަވާލުކުރުމަށެވެ. މި މަސައްކަތުގެ ދަށުން 204 މީޓަރުގެ ޗެނަލް ބްރެކްވޯޓަ ހެދުމާއި 74 މީޓަރުގެ ރިވެޓްމަންޓް ޖެހުމާއި ބަނދަރު ނެރު ފުން ކުރުމާއި 2 ނެރުބައްތި ޖެހުމަށްވެސް ވަނީ ހަމަޖެހިފައެވެ.
އެމްޓީސީސީން ބުނީ މި މަސައްކަތްތައް ނިންމަން އޮތް މުއްދަތުގެ ކުރިން ނިންމުމަށް މަސައްކަތްކުރާނެކަމަށެވެ.