ސީޝެލްގެ ރައީސްގެ ޚާއްސަ ދަޢުވަތަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ސީޝެލްސްއަށް 2 ދުވަހުގެ ރަސްމީ ދަތުރުފުޅެއް ކުރެއްވުމަށް ހަމަޖެއްހިއްޖެއެވެ.
ރައީސުލްޖުމްހޫރިއްޔާ ސީޝެލްއަށް ވަޑައިގަތުމަށް ހަމަޖެހިފައިވަނީ އަންނަ މަހުގެ 2 ވަނަ ދުވަހުއެވެ. ރައީސްގެ މި ދަތުރުފުޅުގައި އެމަނިކުފާނުގެ އަރިހުގައި 3 ވަޒީރަކު ބައިވެރިވެ ވަޑައިގަތުމަށް ހަމަޖެހިފައިވާކަމަށް މަޢުލޫމާތު ލިބެއެވެ.
މި ދަތުރުފުޅުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއި ސީޝެލްސްގެ ރައީސް ބާއްވަވާ ބައްދަލުކުރެއްވުމުގައި ދެ ޤައުމުން ގުޅިގެން މަސައްކަތް ކުރެވިދާނެ ދައިރާތަކާ ގުޅޭގޮތުން މަޝްވަރާ ކުރައްވާނެއެވެ. އެގޮތުން ފަތުރުވެރިކަމާއި އިޤްތިޞާދާއި ކުޅިވަރުގެ ދާއިރާފަދަ މުހިއްމު ދާއިރާތަކާ ގޫޅޭ ގޮތުން މަޝްވަރާކުރެއްވުމަށް ވަނީ ހަމަޖެހިފައެވެ. އަދި މި ދަތުރުފުޅުގައި ދެ ޤައުމުން އެއްބަސްވުންތަކެއްގައިވެސް ސޮއިކުރައްވާނެއެވެ.
ރާއްޖެއާއި ސީޝެލްސްއާ ދެމެދު ޑިޕްލޮމެޓިކް ގުޅުން ޤާއިމްކޮށްފައިވަނީ 1980 ވަނަ އަހަރު ޖުލައި މަހުގައެވެ.