ކޮފީ ފަދަ ބުއިންތައް ވިއްކުމުގައި އާއްމުންގެ މެދުގައި މަޤްބޫލްކަން ހޯދާފައިވާ 'ސްޓަރބަކްސް' އިން ވިޔަފާރި ފުޅާ ކުރުމަށް ކުރަމުންދާ މަސައްކަތްތަކާއި އެކު ތިންވަނަ ކުއާޓަރގައި މާލީ ގޮތުން ބޮޑު ފައިދާއެއް ވެއްޖެއެވެ.
ސްޓަރބަކްސްގެ މާލީ އަހަރު ގުނަނީ ސެޕްޓެމްބަރ މަހުން ފެށިގެންނެވެ. އެގޮތުން މާލީ ތިންވަނަ ކުއާޓަރ ޖޫންމަހަށް ނިމިފައިވާއިރު، އެ ކުއާޓަގައި ސްޓަރ ބަކްސްގެ ވިޔަފާރިއަށް ވަނީ %8.1ގެ ކުރިއެރުމެއް ލިބި، 6.8 ބިލިއަން ޑޮލަރަށް އަރާފައެވެ.
ސްޓަރ ބަކްސްއިން ދަނީ ވިޔަފާރި ފުޅާކުރުމަށްޓަކައި އެ ކުންފުނީގެ ރެސްޓޯރެންޓްތައް ދުނިޔޭގެ އެކި ހިސާބުތަކުގައި ހުޅުވާ އަދަދު އެތައް ގުނައަކަށް އިތުރުކޮށް، އާ އުފެއްދުންތައް ބާޒާރަށް ނެރެމުންނެވެ.
އެގޮތުން އަހަރުގެ ތިންވަނަ ކުއާޓަރގައި ސްޓަރބަކްސްއިން ވަނީ އަލަށް 442 އައުޓްލެޓެއް ހުޅުވާފައެވެ. މީގެ ތެރެއިން ތިންބައިކުޅަ އެއްބައި އައުޓްލެޓްތައް ހުޅުވާފައިވަނީ ޗައިނާގައެވެ. މިއަހަރުތެރޭ ސްޓަރ ބަކްސްގެ 30،000 ވަނަ އައުޓަލެޓް ހުޅުވާފައިވާއިރު، ތިންވަނަ ކުއާޓަރ ނިމުނު އިރު އަލަށް ހުޅުވާފައިވާ އައުޓްލެޓްތަކުގެ އަދަދު ވަނީ 30،600 އަށް އަރާފައެވެ.
ސްޓަރބަކްސްގެ އެންމެ ބޮޑު ދެ މާރކެޓަކީ އެމެރިކާ އަދި ޗައިނާއެވެ. މި ދެޤައުމުގައި ހިންގާ ސްޓަރ ބަކްސްގެ ރެސްޓޯރެންޓްތައް އިތުރުކޮށް ވިޔަފާރި ކުރިއެރުވުމަށް ކުރަމުންދާ މަސައްކަތްތަކާއި އެކު އެމެރިކާގައި އެކުންފުނިން ހިންގާ އައުޓްލެޓްތަކުގެ ވިޔަފާރި %7 ވަނީ އިތުރުވެފައެވެ. އަދި ޗައިނާގައި ހިންގާ ރެސްޓޯރެންޓްތަކުގެ ވިޔަފާރިވަނީ %6 އިތުރުވެފައެވެ.
ސްޓަރބަކްސްގެ ވިޔަފާރި ފުޅާކުރުމަށްޓަކައި ޑެލެވަރީކޮށްދިނުމުގެ ޙިދުމަތް ހަރުދަނާކުރުމަށްވެސް އެކުންފުނިން ދަނީ މަސައްކަތްތަކެއް ކުރަމުންނެވެ. އެގޮތުން އޫބާ އީޓްސްއާއި ގުޅިގެން ޑެލިވަރީގެ ޙިދުމަތްތައް ފުޅާ ކުރުމަށް ރާވާފައިވާ ކަމަށް ސްޓަރ ބަކްސްއިން ހާމަކުރެއެވެ.