މޯލްޑިވްސް ކަސްޓަމްސް ސަރވިސްއާއި މިނިސްޓްރީ އޮފް އެންވަޔަރަމަންޓްއާ ގުޅިގެން ކަސްޓަމްސްގެ އޮފިސަރުންނަށް އަމާޒުކޮށްގެން ހިންގި "އޯޑީ.އެސް ޓްރެއިނިން ޕްރޮގްރާމް" ނިންމާ ބައިވެރިންނަށް ސެޓްފިކެޓް ދީފިއެވެ.
މި ޓްރެއިނިން ޕްރޮގްރާމްގައި ދިވެހި ރާއްޖެއިން މޮންޓްރިއަލް ޕްރޮޓޮކޯލްގައި ބަޔާން ކޮށްފައިވާ ކަންކަން ރާއްޖޭގައި ތަސްފީޒު ކުރުމާއި ބެހޭ ގޮތުން ވަނީ މަޢުލޫމާތު ދީފައެވެ. މީގެ އިތުރުން އޯޒޯން ފަށަލައަށް ގެއްލުންދޭ މާއްދާތަކާއި އެފަދަ ތަކެތި އެތެރެކުރުން ކޮންޓްރޯލް ކުރުމުގައި އެންފޯސްމަންޓް އޮފިސަރުންގެ ޒިންމާގެ މައްޗަށްވެސް ވަނީ އަލިއަޅުވާލާފައެވެ.
އެއްދުވަހުގެ މުއްދަތަށް ކުރިއަށްގެންދިޔަ މި ޕްރޮގްރާމްގައި ކަސްޓަމްސްގެ 30 އޮފިސަރުން ބައިވެރިވެފައިވެއެވެ.
މި ޕްރޮގްރާމްގެ ނިންމުމުގެ ރަސްމިއްޔާތުގައި ވާހަކަދައްކަވަމުން އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ނަސީރު ވަނީ ބައިނަލް އަޤްވާމީ މުއާހަދާތައް ތަންފީޒުކުރުމުގައި ކަސްޓަމްސްގެ ދައުރު ފާހަގަކޮށް ކުރަމުންދާ މަސައްކަތްތައް ފާހަގަކުރައްވާފައެވެ.
މި ޕްރޮގްރާމްގެ މައިގަނޑު މަޤްޞަދަކީ އޯޒޯން ފަށަލައަށް ގެއްލުންދޭ މާއްދާތަކަށާއި އެފަދަ މާއްދާތަކުގެ ތެރެއިން ކޮންޓްރޯލްކޮށްފައިވާ ނުވަތަ މަނާކޮށްފައިވާ ތަކެތި އެތެރެކުރުމުގައި ގެންގުޅެންޖެހޭ އުސޫލްތަކަށް ކަސްޓަމްސް އޮފިސަރުން އަހުލުވެރިކޮށް ތަމްރީން ކުރުމެވެ. ކަސްޓަމްސްގެ މުވައްޒަފުންނަށް ޚާއްސަކޮށްގެން ކޮންމެ އަހަރަކުވެސް މިފަދަ ޕްރޮގްރާމްތައް ކުރިއަށްގެންދެއެވެ.