ރައްޔިތުންގެ މަޖިލީހަށް ވަތް މައްސަލައެއްގައި ތުލުސްދޫ ދާއިރާގެ ކުރީގެ މެމްބަރު މުހައްމަދު ވަހީދު އިބްރާހިމް ހައްޔަރުކޮށް، ބަންދު ކުރީ ގާނޫނާ ހިލާފަށް ކަަމަށް ހައިކޯޓުން ކަނޑައަޅައިފި އެވެ.
އެމައްސަލައާއި ގުޅިގެން ވަހީދުގެ އިތުރުން، އޭރުގެ އިދިކޮޅު އިތުރު މެމްބަރުންތަކެއްވެސް ހައްޔަރުކޮށް، ޖަލަށްލި އެވެ. އެ މެންބަރުން ހައްޔަރުކުރީ، ސްޕުރީމްކޯޓުގެ ހުކުމަކަށް ރިއާޔަތްކޮށް، އިލެކްޝަންސް ކޮމިޝަނުން އެ މެމްބަރުންގެ ގޮނޑި ގެއްލިފައިވާ ކަމަށް ނިންމާފައިވަނިކޮށް، ރައްޔިތުންގެ މަޖިލީހަށް ވަތް މައްސަލާގަ އެވެ.
މި މައްސަލަ ވަހީދުގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުންއިއްޔެ ކޮށްފައިވާ ހުކުމުގައި ބުނެފައިވަނީ ވަޙީދަކީ ރައްޔިތުންގެ މަޖިލީހުގެ މެންބަރެއް ނޫންކަމަށް އިލެކްޝަންސް ކޮމިޝަންއިން ނިންމާފައިވާ ނިންމެވުމާމެދު ގޮތެއް ނިންމުމަށް ޤާނޫނު އަސާސީގެ 74 ވަނަ މާއްދާގެ ދަށުން ދިވެހިރާއްޖޭގެ ސުޕްރީމް ކޯޓަށް މައްސަލަ ހުށަހެޅި، އެކޯޓުގައި މައްސަލަ
ރަޖިސްޓްރީކުރެވިފައިވާކަން އެނގޭނެ ލިޔުންތައް ހުށަހަޅާފައިވާއިރު، ބަންދާމެދު ގޮތެއް ނިންމަވާފައިވަނީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ 13 ވަނަ މާއްދާއާއި ދިވެހިރާއްޖޭގެ ސުޕްރީމް ކޯޓުން ނިންމާފައިވާ ނިންމުމަކާއި ޚިލާފަށް ކަމަށެވެ.
އެ މައްސަލާގައި ވަހީދު އެންމެ ފުރަތަމަ ހައްޔަރު ކުރި ކުރުމަކީ ވެސް އޭގެ އަސްލުން ބާތިލު އިޖުރާއަތެއްގެ މައްޗަށް ބިނާވެގެން ކޮށްފައިވާ ކަމެއް ކަމަށާއި އޭނާ ބަންދު ކުރަން ނެރުނު ކޯޓު އަމުރު ބާތިލު ކުރަން ޖެހޭ ހައިކޯޓުން ވަނީ ނިންމާފައެވެ.
މި މައްސަލާގައި އޭރު ވަހީދު އެންމެ ފުރަތަމަ ބަންދު ކުރީ 15 ދުވަހަށެވެ. ނަމަވެސް އޭގެފަހުން އެތައް ފަހަރެއްގެ މަތިން އޭނާގެ ބަންދުގެ މުއްދަތު ކޯޓުން ވަނީ އިތުރުކޮށްފައެވެ.