ޙައްޖު ކޯޕަރޭޝަންގެ ހަވާލުގައި މިއަހަރު ހައްޖަށް ދާ މީހުން އަންނަ ހޮނިހިރު ދުވަހު ފުރަން ފަށާނެއެވެ.
އެދުވަހު ޙައްޖު ކޯޕަރޭޝަންގެ ހަވާލުގައި ދާ 43 އެމީހުން ފުރުމަށް ހަމަޖެހިފައިވަނީ މެންދުރު 12:10ސަޢުދީ އެއަރލައިންގެ ފްލައިޓުންނެވެ. މީގެއިތުރުން މިމަހުގެ 30 ވަނަ ދުވަހު ރޭގަނޑު ހަތްގަޑި ތިރީސް ފަހެއްގެ ފްލައިޓުން އެ ކޯޕަރޭޝަންގެ ހަވާލުގައި ހައްޖަށްދާ 330 މީހުން ފުރުމަށް ވަނީ ހަމަޖެހިފައެވެ. އަދި އެއްތިރީސްވަނަ ދުވަހު 352 މީހުން ފުރުމަށް ހަމަޖެހިފައިވާއިރު އެ މީހުން ފުރާނީ ރާއްޖެގަޑިން އެދުވަހު މެންދުރު ބާރަގަޑި ދިހައެއްގެ ފްލައިޓުންނެވެ. އަދި އޮގަސްޓް މަހުގެ 1 ވަނަ ދުވަހު 318 މީހުން ފުރުމަށް ވަނީ ހަމަޖެހިފައެވެ. އެމީހުން ފުރާނީ ހަވީރު ތިންގަޑި ވިހީގެ ފްލައިޓުންކަމަށް ހައްޖު ކޯޕަރޭޝަނުން ބުނެއެވެ.
މިއަހަރު ރާއްޖެއިން ޙައްޖަށް މީހުން ގެންދިޔުމަށްޓަކައި 2000 ކޯޓަ ލިބުނެވެ. އޭގެ ތެރެއިން ހައްޖު ކޯޕަރޭޝަނަށް 1050 ކޯޓަ ވަނީ ދީފައެވެ. އަދި މީގެ ތެރެއިން 80 ކޯޓާ އިސްލާމިކް މިނިސްޓަރީގެ ބޭނުމަށް ވަނީ ނަގާފައެވެ. އަދި މިހާތަނަށް އެ ކޯޕަރޭޝަންގެ ހަވާލުގައި މިއަހަރު 1043 މީހުން ހައްޖަށް ދާނެއެވެ.
މާލެއާއި ހުޅުމާލެއާއި ވިލިމާލެއިން ހައްޖައްދާ މީހުންނާއި އެމީހުންގެ އައިލާއަށް އެއަރޕޯޓަށް ހިލޭ ދަތުރުކުރެވޭނެ އިންތިޒާމް ވަނީ ހަމަޖައްސަފައެވެ. އެގޮތުން އެމްޓިސީސީގެ ފެރީއާއި އެމްޕީއެލްގެ ބަސްތަކުގައި ހިލޭ ދަތުރުކުރެވޭނެ އިންތިޒާމް ހަމަޖައްސާފައިވާކަމަށް އެ ކުންފުނިތަކުން ބުނެއެވެ.
ޙައްޖަށް ފުރާ މީހުންގެ ތެރެއިން މާލެއާއި ހުޅުމާލޭގައި ތިބި މީހުން ފުރާ ގަޑީގެ ހަތަރު ގަޑިއިރު ކުރިން އެއާޕޯޓަށް ދިއުމަށް އެ ކޯޕަރޭޝަނުންވެސް އިތްލިމާސްކުރެއެވެ.އަދި ވިލިމާލޭގައި ތިބި ހައްޖުވެރިން ހަތަރު ގަޑިއިރާއި 15 މިނެޓް ކުރިން ޓާމިލަށް ދިއުމަށްވެސް ވަނީ އިލްތިމާސްކޮށްފައެވެ.
މިއަހަހރު ރާއްޖެއިން ޙައްޖަށް ދާ ޖަމާއަތްތަކުގެ ތެރެއިން އެންމެ ފުރުތަމަ ފުރާފައިވަނީ މިމަހުގެ 21 ވަނަ ދުވަހު ޒަޢީ ގޫރޫޕްގެ ހަވާލުގައި ދިޔަ 84 މީހުންނެވެ. މައްކާގައި މިހާރު ޤާއިމްކޮށްފައިވާ ދިވެހި ހައްޖު މިޝަނުން މަޢޫލޫމާތު ދެއްވާ ގޮތުގައި މި ޤުރޫޕްގެ ހަވާލުގައި ހައްޖަށް ދިޔަ ޙާޖީން ޢުމުރާކޮށް ނިމިފައިވާކަމަށާއި މިމަހުގެ 25 ވަނަ ދުވަހު މަދީނާއަށް ދިޔުމަށް ފުރުމަށް ހަމަޖެހިފައިވާކަމަށެވެ.
މީގެ އިތުރުން މިއަހަރުގެ ޙައްޖު މޫސުމުގައި ޙައްޖުވެރިންނަށް ޚިދުމަތް ދިނުމަށްޓަކައި ސައުތުއޭޝިޔާގެ ހައްޖުވެރިންގެ މުޠައްވިފުންނާ ބެހޭ މުއައްސަސާއިން ވަމުންދާ ތައްޔާރީތައް ދެނެގަތުމަށްޓަކައި ދިވެހި ހައްޖު މިޝަނުން ސަޢުދީ ޙައްޖު މުއައްސަސާގެ ރައީސްއާ ވަނީ ބައްދަލުކުރައްވާފައެވެ.
މިއަހަރު ރާއްޖެއިން މީހުން ޙައްޖަށް ގެންދިޔުމަށްޓަކައި ޙައްޖު ކޯޕަރޭޝަނާއެކު 6 ޖަމާއަތަކަށް ވަނީ ހުއްދަ ދީފައެވެ. އަދި މި ޖަމާއަތަތްތަކުގެ ހަވާލުގައި ހައްޖަށް ދާ މީހުން މިމަހުގެ 21 އިން ފެށިގެން އަންނަ މަހުގެ 5 ވަނަ ދުވަހުގެ ނިޔަލަށް ފުރާނެއެވެ.