މޮރިޝަސްގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ވާދަކުރި ރާއްޖޭގެ ޤައުމީ ފުޓްބޯޅަ ޓީމު ކުޅުނު ތިން ވަނަ މެޗުން ވެސް ބަލިވެ މުބާރާތުން ކަޓައިފި އެވެ. ގްރޫޕް ސްޓޭޖުގެ ފަހު މެޗުގައި މިއަދު ރާއްޖޭގެ މެޔޯޓްއާ ވާދަކުރި މެޗުން ބަލިވީ 3-1 އިންނެވެ.
މުބާރާތުގެ ފުރަތަމަ މެޗުގައި 4-0 އިން ރިޔޫނިއަން އަތުން ބަލިވިއިރު ދެ ވަނަ މެޗުގައި ކޮމޮރޯސް އަތުން ރާއްޖޭގެ ޓީމު ބަލިވީ 3-0 އިންނެވެ.
މިއަދުގެ މެޗަށް ނެރުނު ގައުމީ ޓީމުގެ ފުރަތަމަ އެގާރައިގައި އަލަށް ސީނިއާ ޓީމަށް ނެގި ކްލަބް އީގަލްސްގެ ހައިޝަމް ހަސަން އާއި މާޒިޔާގެ ގޯލްކީޕަރު ހުސައިން ޝަރީފް އަދި ކްލަބް ގްރީން ސްޓްރީޓްސްގެ ޒުވާން ކުޅުންތެރިޔާ އަބްދުﷲ ޔާމީން އަށް ކޯޗު ޕީޓަ ސެގާޓް ވަނީ ފުރުސަތު ދީފަ އެވެ.
މެޗުގެ ފުރަތަމަ ގޯލު 15 ވަނަ މިނެޓުގައި މެޔޯޓް އިން ޖެހީ ނެގި ކޯނަރެއްގަ އެވެ. ރާއްޖޭން މެޗުގެ ނަތީޖާ ހަމަހަމަ ކުރި ގޯލު 22 ވަނަ މިނެޓުގައި ކާމިޔާބުކޮށްދިނީ މުހައްމަދު ނާއިމް އެވެ. ރާއްޖޭން އެއްވަރުކުރިތާ ތިން މިނެޓުތެރޭ މެޔޯޓް އިން ވަނީ މެޗުގައި އިތުރު ގޯލެއް ޖަހައި ލީޑު ނަގައިފަ އެވެ. އެޓީމުގެ ކުޅުންތެރިއަކު ދަނޑުގެ މެދުން ކަހަލަ ގޮތަކަށް މަތިމަތިން ފޮނުވާލި ބޯޅަ ސީދާ ގޮސް ވަނީ ގޯލަށެވެ. މެޗުގައި މެޔޯޓްގެ ތިން ވަނަ ގޯލު ޖެހީ 56 ވަނަ މިނެޓުގަ އެވެ. އަރިމަތިން ނަގައިދިން ހުރަސް ރާއްޖޭގެ ކުޅުންތެރިންނަށް ފުރުސަތެއް ނުދީ މެޔޯޓްގެ ކުޅުންތެރިޔާ ގޯލަށް ފޮނުވާލީ ބޮލުން ގޯލުގެ ތެރެއަށް ފޮނުވާލާފަ އެވެ.
ގައުމީ ސީނިއާ ޓީމު ދެން އެންމެ އަވަހަށް ވާދަކުރާނީ އަންނަ ސެޕްޓެމްބަރު މަހު ފަށާ ވޯލްޑް ކަޕް އަދި އޭޝިއަން ކަޕް ކޮލިފައިންގަ އެވެ. ކޮލިފައިންގެ ގްރޫޕް އޭގައި ރާއްޖެއާ އެކު ހިމެނެނީ ޗައިނާ އާއި، ފިލިޕީންސް، ގުއާމް އަދި ސީރިއާ އެވެ.