ޙައްޖާ ގުޅުންހުރި ކަމެއް ޤާނޫނާއި ޤަވާއިދާ ޚިލާފަށް ކުރިއަށްދާނަމަ ހުއްޓުވާނެ - ނާއިބް ރައީސް
ޙައްޖާ ގުޅުންހުރި އެއްވެސްކަމެއް ޤާނޫނާއި ޤަވާއިދާ ޚިލާފަށް ކުރިއަށްދާނަމަ އެކަން ސަރުކާރުން ވަރަށް ގާތުން ބަލައި ހުއްޓުވާނެކަމަށް ނާއިބްރައީސް ފައިސަލް ނަސީމް ވިދާޅުވެއްޖެއެވެ.
ރާއްޖެއިން މިއަހަރު ޙައްޖަށްދާ މީހުންގެ ފުރަތަމަ ގުރޫފުގެ މީހުންނާ ބައްދަލުކުރެއްވުމަށް އެއަރޕޯޓަށް ވަޑައިގެން، ނޫސްވެރިންނަށް މަޢުލޫމާތުދެއްވަމުން ނާއިބް ރައީސް ވިދާޅުވީ ޙައްޖުގެ ކަންކަމަކީ ސަރުކާރުން ވަރަށްބޮޑު އިސްކަމެއް ދީގެން ބަލަމުންދާ ކަމެއްކަމަށެވެ. އެހެންކަމުން ޙައްޖާ ގުޅުންހުރި އެއްވެސްކަމެއް ޤާނޫނާއި ޤަވާއިދާ ޚިލާފަށް ހިނގާނަމަ އެކަން ހުއްޓުވައި އަލަންޖެހޭ ޤާނޫނީ ފިޔަވަޅުތައް ސަރުކާރުން އަޅަމުންދާނެ ކަމަށެވެ.
ރާއްޖެއިން މިއަހަރު މީހުން ޙައްޖަށް ގެންދިއުމުގެ ހުއްދަ ޙައްޖު ކޯޕަރޭޝަނާއެކު 6 ކުންފުންޏަކަށް ދީފައިވާއިރު، މިހާތަނަށް މީގެ ތެރެއިން އެއް ކުންފުންޏަކުން، މީހުންގެ އަތުން ގިނައިން ފައިސާނެގިކަމަށް ތުހުމަތު ކުރެވޭ މައްސަލައެއް ފުލުހުން ދަނީ ތަޙްޤީޤުވެސް ކުރަމުންނެވެ.
ނާއިބް ރައީސް ވިދާޅުވީ ޙައްޖުގެ އަޅުކަން އަދާކުރަން ރާއްޖެއިން ދާ މީހުންނަށް ލުއި ފަސޭހަ ގޮތްތަކެއް ހަމަޖައްސައިދިނުމަށް ސަރުކާރުން ވަރަށް ބޮޑު އިސްކަމެއް ދޭ ކަމަށެވެ. އަދި ދިމާވާ ދަތިތަކަށް ބަލައި ކުރިއަށްއޮތްތަނުގައި އެކަންކަން ރަނގަޅު ކުރުމަށްވެސް ސަރުކާރުން މަސައްކަތް ކުރަމުންދާކަމަށް ނާއިބް ރައީސް ވިދާޅުވިއެވެ.
ނާއިބް ރައީސް ވަނީ ދިވެހި ޙައްޖާޖީންގެ ކަންކަން އެމީހުން ރާއްޖެއަށް އެނބުރި އައުމާ ހަމައަށް ސަރުކާރުން ވަރަށް ގާތުން ބަލަމުންދާނެ ކަމަށެވެ. ރާއްޖެއިން މިއަހަރު ޙައްޖަށްދާ މީހުންނަށް އެހީތެރިވުމަށް ސަޢުދީ އަރަބިއްޔާގެ މައްކާގައި ޙައްޖު މިޝަންގެ އޮފީހެއްވެސް މިހާރު ވަނީ ޤާއިމްކޮށްފައެވެ.
ކޮންމެ ސަރުކާރަކުންވެސް އިތުރަށް ޙައްޖު ކޯޓާ ހޯދުމަށް މަސައްކަތްކުރާކަން ފާހަގަކުރައްވާ ނާއިބްރައީސް ވިދާޅުވީ ސަރުކާރުގެ އަމާޒަކީ ޙައްޖަށް ދާން ބޭނުންވެ މިހާތަނަށް ފުރުޞަތު ނުލިބިތިބި ފަރާތްތަކަށް އެ ފުރުޞަތު ފަސޭހައިން ލިބޭނެ މަގު ފަހިކޮށްދިނުން ކަމަށެވެ.