މިއަހަރު ރާއްޖެއިން ޙައްޖަށްދާ މީހުން ފުރަން ފަށައިފިއެވެ.
އެގޮތުން މިއަދު އެންމެ ފުރަތަމަ ފުރާފައިވަނީ ޒަޢީ ގުރޫޕް ލިމިޑެޓްގެ ހަވާލުގައި ޙައްޖަށްދާ 84 މީހުންނެވެ. މި މީހުން ފުރާފައިވަނީ މިއަދު ހެނދުނު 9:20ގައެވެ. މި މީހުން ފުރުވުމަށް ރައީސުލްޖުމްހޫރިއްޔާގެ ނައިބް ފައިޞަލް ނަސީމާއި އިސްލާމިކް މިނިސްޓަރ ޑރ.އަޙްމަދު ޒާހިރު ވަނީ ވެލާނާ އިންޓަރނޭޝަނަލް އެއަރޕޯޓަށް ވަޑައިގެން ފުރުމުގެ ކުރިން އެމީހުންނާ ބައްދަލުވެސް ކުރައްވާފައެވެ.
މިއަހަރު ރާއްޖެއިން ޙައްޖަށްދާ މީހުން ފުރުމަށް ހަމަޖެހިފައިވަނީ މިމަހުގެ 21 އިން އަންނަ މަހުގެ 5 ވަނަ ދުވަހުގެ ނިޔަލަށެވެ. ދެން އެންމެ އަވަހަށް ފުރުމަށް ހަމަޖެހިފައިވަނީ މިމަހުގެ 25 ވަނަ ދުވަހު 154 ހައްޖާޖީންނާއެކު ތަޒްކިޔާ ޕްރައިވެޓް ލިމިޓެޑްގެ ހަވާލުގައި ޙައްޖަށްދާ މީހުންނާއި 144 މީހުންނާއެކު އަލް ޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑްގެ ހަވާލުގައި ހައްޖަށްދާ މީހުންނެވެ.
މިއަހަރު ރާއްޖެއިން ހައްޖަށް މީހުން ގެންދިޔުމަށްޓަކައި ވަނީ 2000 ކޯޓާ ލިބިފައެވެ. މިހާތަނަށް ލިބިފައިވާ މަޢޫލޫމާތަށް ބަލާއިރު 1684 މީޙުން މިއަހަރު ޙައްޖަށް ދާނެއެވެ.
މިއަހަރު މާލެއިން ޙައްޖުވެރިންނަށް ލުއިފަސޭހަ ވާނެ ގޮތަކަށް ކަންކަން ބެލެހެއްޓުމަށްޓަކައި ސަރުކާރުގެ އެކި މުއައްސަސާތައް ބައިވެރިވެއެވެ. އެގޮތުން އެމްއެންޑީއެފްއާއި ޕުލުހުންނާއި، އެމްޓީސީސީއާއި، އެމްޕީއެލްގެ އިތުރުން އެމްއޭސީއެލްއިން ހަރަކާތްތެރިވަމުން ގެންދާނެއެވެ.
މާލެއާއި ހުޅުމާލެއާއި ވިލިމާލެއިން ހައްޖައްދާ މީހުންނާއި އެމީހުންގެ އައިލާއަށް އެއަރޕޯޓަށް ހިލޭ ދަތުރުކުރެވޭނެ އިންތިޒާމް ވަނީ ހަމަޖައްސަފައެވެ. އެގޮތުން އެމްޓިސީސީގެ ފެރީއާއި އެމްޕީއެލްގެ ބަސްތަކުގައި ހިލޭ ދަތުރުކުރެވޭނެ އިންތިޒާމް ހަމަޖައްސާފައިވާކަމަށް އެ ކުންފުނިތަކުން ބުނެއެވެ.
މީގެ އިތުރުން ވިލިމާލެ ފެރީ ޓާރމިނަލްއާއި ހުޅުލެ ހުޅުމާލެ ބަސްޓަރމިނަލްތަކުގައި ސަލާމަތީ ކަންކަން ބެލެހެއްޓުމާއި އެއަރޕޯޓުން ހައްޖަސް ފުރާ މީހުންގެ ލަގެޖް ކްލިއަރެންސް ކުމުގައި އެމްއެންޑީއެފް ހަރަކާތްތެރިވުމަށް ހަމަޖެހިފައިވާއިރު، ޙައްޖައްދާ މީހުން ފުރާ ގަޑިތަކުގައި ޓްރެފިކް ބެލެހެއްޓުމާއި ޕާކްކުރެވޭނެ އިންތިޒާމްތައް ފުލުހުން ހަމަޖައްސައިދެމުންދާނެއެވެ. މީގެ އިތުރުން އެމްއޭސީއެލްއިންވެސް ވަނީ ޙައްޖާޖީންނަށް ލުއިފަސޭހަ ކޮށްދިނުމުގެ ގޮތުން އެއްދުވަހުގެ ކުރިން ޗެކިންކުރެވޭނެ އިންތިޒާމްވެސް ހަމަޖައްސާފައެވެ.
އިސްލާމިކް މިނިސްޓްރީން ވަނީ ޙައްޖަށް ފުރާ މީހުންގެ ތެރެއިން މާލެއާއި ހުޅުމާލޭގައި ތިބި މީހުން ފުރާ ގަޑީގެ ހަތަރު ގަޑިއިރު ކުރިން އެއާޕޯޓަށް ދިއުމަށް އިލްތިމާސް ކޮށްފައެވެ. އަދި ވިލިމާލޭގައި ތިބި ހައްޖުވެރިން ހަތަރު ގަޑިއިރާއި 15 މިނެޓް ކުރިން ޓާމިލަށް ދިއުމަށްވެސް މިނިސްޓްރީން ވަނީ އިލްތިމާސްކޮށްފައެވެ.
ރާއްޖެއިން މިއަހަރު ޙައްޖަށްދާ މީހުންނަށް އެހީތެރިވުމަށް ސަޢުދީ އަރަބިއްޔާގެ މައްކާގައި ޙައްޖު މިޝަންގެ އޮފީސް މިއަހަރުވެސް ވަނީ ޤާއިމުކޮށްފިއެވެ.
މިއަހަރު ރާއްޖެއިން ޙައްޖު ކޯޕަރޭޝަނާއެކު 6 ކުންފުންޏެއްގެ ހަވާލުގައި މީހުން ޙައްޖަށް ދާނެއެވެ.