މޫދަށް ފޭބިފަހުން ޚަބަރެއް ނުވެގެން ހޯދަމުންދިޔަ މީހާ ކަނޑު އަޑީގައި މަރުވެފައި އޮއްވާ ފެނިއްޖެ
ގުޅިފަޅުގައި އަޅާފައި އޮތް ކަންނެލި ދޯންޏެއްގެ ނަގިލި ނަގަން މޫދަށް ފޭބިފަހުން ޚަބަރެއް ނުވެގެން ހޯދަމުންދިޔަ މީހާ ކަނޑު އަޑީގައި މަރުވެފައި އޮއްވާ ފެނިއްޖެއެވެ.
އެ މީހާގެ ހަށިގަނޑު އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ އެހީތެރިކަމާއެކު މިއަދު 17:00 ހާއިރު މާލެ ގެނެސް، އައިޖީއެމް ހޮސްޕިޓަލަށް މިހާރު ގެންގޮސްފައިވާކަމަށް އެމްއެންޑީއެފުން މަޢުލޫމާތުދެއެވެ.
އެމްއެންޑީއެފުން ބުނީ މި މީހާ ފެނިފައިވަނީ މިއަދު ހަވީރު 16:23 ހާއިރު ކަނޑުގެ 21 މީޓަރު އަޑިން ކަމަށެވެ. ކ.ގުޅީ ފަޅުގައި އަޅާފައި އޮތް "ސާހިބާ" ނަމަކަށްކިޔާ މަސް ދޯންޏެއްގައި މަސައްކަތްކުރާ މި ބިދޭސީ މީހާގެ ޚަބަރެއް ނުވެގެން ހޯދަން ފަށާފައިވަނީ މިއަދު ހެނދުނު އެ ދޯނީގެ ނަގިލި ނަގަން މޫދަށް ފޭބިފަހުންނެވެ. އެ ދޯނީގެ ފަޅުވެރިއެއްގެ ގޮތުގައި މަސައްކަތްކުރާ މި މީހާއަކީ ބަންގްލަދޭޝްގެ ރައްޔިތެއްކަމަށް ފުލުހުން މައުލޫމާތުދެއެވެ.
މީމީހާ ހޯދުމަށް މިއަދު ހެނދުނު 09:00 އިން ފެށިގެން އެމްއެންޑީއެފް ކޯސްޓްގާޑުގެ ޑައިވަރުން ވަނީ ހަރަކާތްތެރިވެފައެވެ. އެގޮތުން އެމީހާ ނަގިލި ނަގަން ފޭބި ކަމަށް ދޯނީގެ ކެޕްޓަން ބުނި ސަރަޙައްދަށް ޑައިވަރުން ފައިބައިގެން އޭނާ ހޯދުމަށް ގިނަ މަސައްކަތްތަކެއް ކޮށްފައިވާކަމަށް އެމްއެންޑީއެފުން މަޢުލޫމާތުދެއެވެ. އަދި މި މީހާ ހޯދުމަށްޓަކައި ކޯސްޓްގާޑުގެ ޑައިވަރުން ތިން ޑައިވެއް ކޮށްފައިވާކަމަށްވެސް އެމްއެންޑީއެފުން ބުނެއެވެ.