ރާއްޖޭގެ 8 ޓީވީ ޗެނަލެއް މިހާރަށްވުރެ ސާފު ކޮލިޓީގައި ބެލުންތެރިންނަށް ހިލޭ ބެލޭނެ ޚިދުމަތް ދިނުމުގެ ބޮޑު މަޝްރޫއެއް ޕީއެސްއެމުން ފަށައިފިއެވެ.
މިއީ 2021ވަނަ އަހަރުގެ ކުރީކޮޅު ޑިޖިޓަލް ޓެރެސްޓްރިއަލް ޓެލެވިޜަންގެ ޚިދުމަތް ރާއްޖޭގެ އާބާދީގެ ނުވަދިހަ އިންސައްތައަށް ވުރެ ބޮޑު ބަޔަކަށް ދިނުމަށް ހިންގާ މަޝްރޫއެކެވެ. ޖަޕާނުގެ ސަރުކާރުގެ އެހީތެރިކަމާއެކު ކުރިއަށް ގެންދާ މިޝްރޫއުގެ ސަބަބުން ދިވެހި ޗެނަލްތައް ރާއްޖޭގެ ހުރިހާ ހިސާބަކަށް ސާފުކޮށް ލިބޭނެއެވެ. މީގެއިތުރުން މޫސުމާއި ގުޅިގެން މޫސުމާއި ބެހޭ ޤައުމީ އިދާރާއިން ނެރޭ މައުލޫމާތުތަކާއި އިންޒާރުތައް ކަނޑު ދަތުރުކުރާ ފަރާތްތަކަށް ވަގުތުން ލިބިގެންދާނެއެވެ.
މި މަޝްރޫއުގެ މަސައްކަތް ރާއްޖޭގެ 19 ސަރަހައްދެއްގައި ކުރިއަށް ގެންދިޔުމަށް ވަނީ ހަމަޖެހިފައެވެ. މި މަސައްކަތް ކުރިއަށްދާނީ ޖަޕާނުގެ ކޮންސަލްޓަންސީ ކުންފުންޏެއްގެ ބެލުމުގެ ދަށުންނެވެ.
ޕީއެސްއެމްގެ ޕްރޮޖެކްޓް ޑިރެކްޓަރ އަބްދުﷲ ސިޔާދު ވިދާޅުވީ މި މަޝްރޫއުގެ ޢަމަލީ މަސައްކަތް އަންނަ މަހުގެ ފަހުކޮޅު ފެށުމަށް މަސައްކަތްކުރަމުން ދާކަމަށެވެ. ފުރަތަމަ 11 ސަރަޙައްދެއްގައި އެއް ފަހަރާ މި މަސައްކަތް ފަށާނެ ކަމަށާއި ދޮޅު އަހަރުދުވަހުގެ ތެރޭގައި ރާއްޖޭގެ 19 ސަރަހައްދެއްގައި ސިސްޓަމްތައް ޤާއިމްކުރާނެކަމަށްވެސް ސިޔާދު ވިދާޅުވިއެވެ. އެއަށްފަހު ސިގްނަލް ދަށްވާ ހިސާބުތައް ނުވަތަ ކަވަރޭޖް ނުލިބޭ ހިސާބުތައް ބެލުމަށްފަހު ދެވަނަ ފިޔަވަހީގައި އެކަން ރަނގަޅުކުރުމަށް މަސައްކަތްކުރާނެކަމަށް ސިޔާދު ވިދާޅުވިއެވެ.
"ކޭބަލް ޓީވީ މެދުވެރި ނުކޮށްވެސް ލޯކަލް ޗެނަލްތައް ބެލުމުގެ ފުރުޞަތު ލިބޭނެ. މޫސުމީ މަޢުލޫމާތުތަކާއި ގުދުރަތީ ކާރިސާއެއް މެދުވެރިވެއްޖެ ހިނދެއްގައި އެފަދަ މަޢުލޫމާތުތައްވެސް ވަގުތުން ވަގުތައް ރައްޔިތުންނަށް ފޯރުކޯށްދެވޭނެ. ޖަޕާނު ސަރުކާރުން މި މަޝްރޫއަށް ގާތްގަޑަކަށް 22 މިލިޔަން ޑޮލަރު ހޭދަކުރޭ. އަދި ދިވެހި ދަޢުލަތުން ވެސް ފުރަތަމަ ފިޔަވައްސަށް 57 މިލިޔަން ރުފިޔާ އެބަ ހަރަދުކުރޭ."ސިޔާދު ވިދާޅުވިއެވެ.
މި ޚިދުމަތް ދޭން ފެށުމާއެކ ރާއްޖެއަކީ މި ސަރަޙައްދުގައިވެސް ޑިޖިޓަލް ޓީވީގެ ޚިދުމަތް ދޭނެ ފުރަތަމަ ޤައުމަށް ވާނެކަމަށް ޕީއެސްއެމް ބުނެއެވެ. އެހެންކަމުން މި މަޝްރޫއު ކުރިޔަށް ގެންދިޔުމަށް ކައުންސިލްތަކުގެ އެހީތެރިކަން ބޭނުންވާކަމަށާއި އެކަމުގައި ކައުންސިލްތަކުން އެއްބާރާލުން ދިނުމަށް ފީއެސްއެމުން އިލްތިމާސްކުރެއެވެ.