ދިރާގު ދިވެހި ޕްރިމިއާ ލީގުގައި މިރޭ މާޒިޔާ އާއި ކްލަބް އީގަލްސް ބައްދަލުކުރި މެޗު 1-1 އިން އެއްވަރުވެ ލީގުގެ އެއްވަނައަށް އަރަން ލިބުނު ފުރުސަތު މާޒިޔާއިން ގެއްލުވާލައިފި އެވެ.
މި ނަތީޖާއާއެކު ލީގުގެ އެއް ވަނައިގައި އޮތީ ފަސް މެޗުން 12 ޕޮއިންޓް ހޯދާފައިވާ ދަ ގްރާންޑޭ ސްޕޯޓްސް ކްލަބެވެ. ދެ ވަނައިގައި 11 ޕޮއިންޓް ހޯދައިގެން މާޒިޔާ އޮތްއިރު، ތިން ވަނައިގައި އޮތީ 8 ޕޮއިންޓާ އެކު ޓީސީ ސްޕޯޓްސް ކްލަބެވެ. މާޒިޔާ އަތުން ހޯދި ޕޮއިންޓާ އެކު އީގަލްސް ވަނީ ފަސް ވަނަ އަށް ކުރިއަށް ޖެހިލާފަ އެވެ.
މެޗު ފަށައިގެން މާ ގިނައިރުތަކެއް ނުވަނީސް މާޒިޔާއިން ވަނީ ލަނޑެއް ޖަހާ މެޗުގައި ލީޑު ނަގާފައި އެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހީމް ވަހީދު ހަސަން އެވެ.
ފުރަތަމަ ހާފު އީގަލްސް އިން ގޯލު ޖަހާނެ އެންމެ ހުސް ފުރުސަތެއް ލިބުނީ މުހައްމަދު ނާއިމް އަށެވެ. މާޒިޔާގެ ޑިފެންޑަރެއްގެ ފައިގައި ޖެހިފައި ނާއިމް އަށް އޭރިޔާ ތެރެއިން ހުސްކޮށް ލިބުނު ބޯޅަ ފޮނުވާލުމުން ކީޕަރު އޮވޭސް އަޒީޒީ ވަނީ ފައިން އެބޯޅަ މަތަކޮށްފަ އެވެ.
ގޯލެއް ޖަހަން ކުރިއަށް އަރައިގެން މަސައްކަތް ކުރި އީގަލްސް އިން މެޗުގެ ނަތީޖާ ހަމަހަމަ ކުރީ މެޗުގެ 74 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމް ހޯދި މިޑްފީލްޑަރު އުމަރުޖޯނޯވް އަކްރޯރް އެވެ. އީގަލްސް އިން ނަތީޖާ ހަމަހަމަ ކުރުމަށް ފަހު ވެސް އެޓީމަށް ވަނީ ގޯލު ޖަހާނެ ރަނުގެ ފުރުސަތެއް ލިބި ބޭކާރުވެފަ އެވެ.
މިރޭގެ މެޗާއެކު ލީގުގެ ކުޅުން އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް މެދުކަނޑާލާނެ އެވެ. ބްރޭކަށް ފަހު ލީގުގެ ކުޅުން އަލުން ފަށާނީ އަންނަ މަހުގެ ތިން ވަނަ ދުވަހު އެވެ.