ރައްޔިތުންގެ މަޖިލީހުގެ ވިލުފުށީ ދާއިރާގެ ކުރީގެ މެންބަރު ރިޔާޒް ރަޝީދު މަސްލަހަތު އޮންނަ މެރީޑިއަމް ކުންފުންޏަށް އެސްޓިއޯ އިން ވިއްކި ތެލުގެ އަގަށްވާ 19 މިލިއަން ރުފިޔާއާއި ގުޅުންހުރި ލިޔެކިއުންތައް ފެނިފައިވާކަމަށް އެކުންފުނިން ބުނެފިއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަޒް ކޮމިޓީގައި ވާހަކަ ދައްކަވަމުން އެސްޓީއޯގެ މެނޭޖިންގ ޑިރެކްޓަރ ޙުސައިން ޢަމްރު ވިދާޅުވީ، އެސްޓީއޯއިން މެރީޑިއަމް ކުންފުންޏަށް ވިއްކާފައިވާ ތެލުގެ މުޢާމަލާތައް ޕްރިންޓްކޮށްފައިވާ އެއްވެސް ލިޔެކިއުމެއް މިހާތަނަށް ފެނިފައިނުވާކަމަށެވެ.
ޢަމްރު ވިދާޅުވީ އެކުންފުންޏަށް ލިބެންޖެހޭ ގިނަ ޢަދަދެއްގެ ފައިސާއާއި ގުޅުންހުރި މެރީޑިއަމްގެ މައްސަލަ ނުނިމި ހައިކޯޓްގައި ގިނަދުވަސްވެފައިވަނީ އެކަމާއި ގުޅުންހުރި ލިޔެކިއުންތައް ނުފެނިގެންކަމަށެވެ. ނަމަވެސް އެ މުޢާމަލާތްތައް ކޮށްފައިވާ ޑިޖިޓަލް ލިޔެކިއުންތައް ކޮމްޕިއުޓަރުތަކުން މިހާރު ފެނިފައިވާކަމަށާއި އެ ލިޔެކިއުންތައް މިހާރު ހައިކޯޓަށް ހުށައަޅަފައިވާކަމަށް ޢަމްރު ވިދާޅުވިއެވެ.
ޢަމްރު ވިދާޅުވީ، އެ މައްސަލަ ނުނިމި ގިނަދުވަސްތަކެއްވެފައިވާތީ އެ ކުންފުންޏަށް ބޮޑެތި ގެއްލުންތަކެއް ލިބެމުންދާކަމަށެވެ. އެ މައްސަލަ އަވަސްކޮށްދިނުމަށް ހައިކޯޓްގައި މިހާރު އެދިފައިވާނެކަމަށްވެސް އަމްރު ވިދާޅުވިއެވެ.
2010 ވަނަ އަހަރުގެ މާޗްމަހުގ ނިޔަލަށް އެޓީއޯއިން މެރީޑިއަމަށް ވިއްކި ތެލަށްވާ 19.3 މިލިއަން ރުފިޔާ ނުލިބިވާތީ އެސްޓީއޯއިން ވަނީ އެ މައްސަލަ ސިވިލް ކޯޓަށް ހުށައަޅާފައި. ނަމަވެސް 2016 ވަނަ އަހަރުގެ ޖޫންމަހު ސިވިލް ކޯޓުން ކުރި ހުކުމްގައިވަނީ މެރީޑިއަމްއަށް ތެޔި ވިއްކިކަން ސާބިތުނުވާކަމަށް. އެހެންކަމުން އެފައިސާ ދޭން ޢަމަުރުކުރާނެ ތަނެއް ނެތްކަމަށްވެސް ކޯޓް ޢަމުރުގައިވޭ. މިހާރު އެ މައްސަލަ ކުރިއަށްދަނީ ހައިކޯޓްގައި.