ދެކުނު އިރުމަތީ އޭޝިއާގެ ޤައުމުތައް އުމްރާނީ ގޮތުން ތަރައްޤީކުރުމުގައި އެންމެ އިސް ދައުރެއް އަދާކުރަނީ ޖަޕާނުންކަމަށް ފިޗް ސްލޯޝަންގެ އިން ނެރުނު ރިޕޯޓަކުން ދައްކައިފިއެވެ.
އެ ރިޕޯޓުގައިވާ ގޮތުން ޖަަޕާނުން ދެކުނު އިރުމަތީ އޭޝިއާގެ ޤައުމުތަކުގައި ކުރިއަށްގެންދާ މަޝްރޫއުތަކުގެ އަގު 367 މިލިއަން ޑޮލަރަށް އަރައެވެ. ދެކުނު އިރުމަތީ އޭޝިއާގައި ދެވަނައަށް އެންމެ ގިނަ އަދަދަކަށް މަޝްރޫއުތައް ކުރިއަށްގެންދަނީ ޗައިނާއިންނެވެ. ޗައިނާއިން ކުރިއަށްގެންދާ މަޝްރޫޢުތަކުގެ އަގު އަރަނީ 255 މިލިއަން ޑޮލަރަށެވެ.
ދެކުނު އިރުމަތީ އޭޝިއާގެ ޤައުމުތަކުގެ ތެރެއިން ޖަޕާނުން އެންމެ ގިނަ އަދަދަކަށް މަޝްރޫޢުތައް ކުރިއަށްގެންދަނީ ފިލިޕީންސް، ސިންގަޕޫރު އަދި ވިއެޓްނާމްގައެވެ.
ފިޗްގެ ރިޕޯޓުން ދެއްކި ނަތީޖާއަކީ ހައިރާން ކުރުވަނިވި ނަތީޖާއެއް ކަމަށް އިޤްތިސާދީ މާހިރުން ބުނެއެވެ. ސަބަބަކީ ޖަޕާންގެ އިޤްތިސާދީ ދުވެލި އެއް ހަމައެއްގައި ހިފެހެއްޓިފައި އޮންނަތާ ގިނަ އަހަރުތަކެއް ވެފައިވުމާއި، ފާއިތުވި އަހަރުތަކުގައި ޗައިނާގެ އިޤްތިސާދު އެތައް ގުނައަކަށް ކުރިއަރާފައިވުމާއެކު، ޖަޕާންގެ އިޤްތިސާދަށްވުރެ ކުރީގައި މިހާރު އުޅެނީ ޗައިނާގެ އިޤްތިސާދު ކަމަށްވުމެވެ.