ފުލުހުންގެ ބެލުމުގެ ދަށަށް ގެނެސްފައިވާ މަސްތުވާތަކެތީގެ ތެރެއިން ގާތްގަނޑަކަށް 414 މިލިޔަން ރުފިޔާގެ މަސައްތުވާތަކެތި ނައްތާލައިފިއެވެ.
މި މަސްތުވާތަކެތި ނައްތާލާފައިވަނީ ބައިނަލްއަޤްވާވީ ގޮތުން ފާހަގަކުރާ މަސްތުވާތަކެއްޗާ ދެކޮޅަށް މަސައްކަތްކުރާ ދުވަހާ ގުޅުވައިގެން ބޭއްވި ރަސްމިއްޔާތެއްގައެވެ. މި ރަސްމިއްޔާތު ބާއްވާފައިވަނީ އާއްމުންނަށް ބައިވެރިވެވޭގޮތަށް ދޫނިދޫގައެވެ. އަދި މިއީ މިހާ ގިނައަދަދެއްގެ މަސްތުވާ ތަކެތި އެއްފަހަރާ ނައްތާލި ފުރަތަމަ ފަހަރުކަމަށް ފުލުހުން މަޢުލޫމާތުދެއެވެ. މި ރަސްމިއްޔާތުގައި ނައިބްރައީސް ފައިޞަލް ނަޞީމްވެސް ބައިވެރިވެވަޑައިގެންނެވިއެވެ.
ނައްތާލި މަސްތުވާތަކެއްޗަކީ 2014 ވަނަ އަހަރުގެ ޖެނުއަރީ މަހުންފެށިގެން މިއަހަރުގެ ޖޫންމަހާ ހަމަޔަށް ތަފާތު 3165 މައްސަލައެއްގައި ފުލުހުންގެ ބެލުމުގެ ދަށަށް ގެނެވިފައިވާ މަސްތުވާތަކެތިކަމަށް ފުލުހުން މަޢުލޫމާތުދެއެވެ. އަދި މި މަސްތުވާތަކެތީގައި 419 ކިލޯ ހުންނާނެ ކަމަށްވެސް ފުލުހުން މަޢުލޫމާތުދެއެވެ. މިއީ ގާތްގަނޑަކަށް 414 މިލިޔަން ރުފިޔާގެ މަސައްތުވާތަކެތި ކަމަށްވެސް ފުލުހުން ބުނެއެވެ.
ނައްތާލި މަސްތުވާތަކެތީގެ ތެރޭގައި މިއަހަރުގެ އޭޕްރީލްމަހުގެ 28 ވަނަ ދުވަހު ގދ.ހުޅުވާރުލުން ހޯދި 149 ކިލޯގެ މައްސަތުވާތަކެއްޗާއި މިއަހަރުގެ މެއި މަހުގެ 6 ވަނަ ދުވަހު ރާއްޖޭގެ ކަނޑުގެ ސަރަހައްދުން އަތުލައިގަތް އީރާނުގެ ބޯޓުން އަތުލައިގަތް 50 ކިލޯގެ މަސްތުވާތަކެތި ހިމެނެއެވެ.
މީގެ އިތުރުން 2016 ވަނަ އަހަރުގެ ޖޫން މަހުގެ 6 ވަނަ ދުވަހު ކަނޑުމަގުން ރާއްޖެ އެތެރެ ކުރަން އުޅުނު 29 ކިލޯގެ މަސްތުވާތަކެއްޗާއި 2014 ވަނަ އަހަރުގެ މާރޗް މަހުގެ 11 ވަނަ ދުވަހު އިރާންގެ ބޯޓަކުން ރާއްޖެ އެތެރެކުރަން އުޅުނު 24 ކިލޯގެ މަސްތުވާތަކެތި ހިމެނެއެވެ.
މަސްތުވާތަކެތި ނައްތާލުމަށް ބޭއްވި ރަސްމިއްޔާތަށްފަހު ނޫސްވެރިންނަށް މައުލޫމާތުދެއްވަމުން ހޯމް މިނިސްޓަރަ އިމްރާން ޢަބްދުﷲ ވިދާޅުވީ އާއްމުން ބައިވެރިކޮށްގެން މިހާ ގިނަ ޢަދަދެއްގެ މަސްތުވާތަކެތި އެއްފަހަރާ ނައްތާލުމުން، މަސްތުވާ ތަކެއްޗާ ދެކޮޅަށް މަސައްކަތްކުރުމަށް ސަރުކާރުން މަސައްކަތް ކުރަމުންދާ މިންވަރު ހާމަވެގެންދާކަމަށެވެ. އަދި ސަރުކާރުގެ އަމާޒަކީ ދިވެހި ޒުވާނުން މަސްތުވާތަކެތީގެ ވަބާއިން ދުރުކުރުންކަމަށް މިނިސްޓަރ ވިދާޅުވިއެވެ.
"ކުރިއަށް އޮތް ފަސް އަހަރުދުވަހުގެ ތެރޭގައި ރާއްޖޭގައި މަސައްތުވާތަކެތީގެ ޝިކާރައަށްވާ ޒުވާނުން އެކަމުން ސަލާމަތްކުރުމަށް ހެޔޮބަދަލެއް ގެނެވިގެންދާނެ"އިމްރާން ވިދާޅުވިއެވެ.
ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ ތަފާތު މައްސަލަތަކުގައި ހޯދާ މަސްތުވާތަކެތި އެއް މަސްދުވަހުގެ ތެރޭ ނައްތާލުމަކީ ފުލުހުންގެ އަމާޒެއްކަމަށެވެ. އަދި މިގޮތަށް މަސްތުވާތަކެތި ނައްތާލާނީ މައްސަލަ ބެލުމަށްޓަކައި ބަހައްޓަންޖެހޭ 8 ގްރާމްގެ މަސްތުވާތަކެތި ބެހެއްޓުމަށްފަހުގައި ކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ.
"މަސްތުވާތަކެތި ނައްތާލުމުގެ މިފަދަ ހަރަކާތްތައް ކުރިއަށް ގެންދިއުމުގެ ބޭނުމަކީ އާންމުންނަށް ވީހާ ވެސް ހާމަކަން ބޮޑު ގޮތެއްގައި ކުރިއަށް ގެންދިއުން" ހަމީދު ވިދާޅުވިއެވެ.
ފުލުހުންގެ ބެލުމުގެ ދަށުގައި ހުންނަ މަސްތުވާތަކެތި ނައްތާލަނީ ޕްރޮސިކިއުޓަރ ޖެނެރަލް އެކުލަވާލާ 5 މެމްބަރުން ހިމެނޭ ކޮމެޓީއަކުން ބެލުމަށްފަހުގައެވެ.
އެގޮތުން މޯލްޑިވްސް ޕޮލިސް ސަރވިސްއަށް ހުށައަޅާ މައްސަލަތަކުގެ ތެރެއިން ޝަރީއަތުގެ އެކި މަރުހަލާތައް ނިމިފައިވާ މަސްތުވާތަކެތީގެ ބަރުދަނަށް ބަލައި މަސްތުވާތަކެތި ޓްރެފިކް ކުރުމުގެ ކުށުގެ ދަޢުވާ ކުރެވޭ މިންވަރުގެ 2 ގުނަ ބެހެއްޓުމަށްފަހު ބާކީ މަސްތުވާތަކެތި ނައްތާލައެވެ.
އެއްފަހަރާ ގިނަ އަދަދެއްގެ މަސްތުވާތަކެތި ނައްތާލުމަށް ބޭވި ހަރަކާތުގައި އެޑިއުކޭޝަން މިނިސްޓަރާއި ޕްރޮސެކިޓަރ ޖެނަރަލްގެ އިތުރުން ސަރުކާރުގެ އިސްވެރިން ބައިވެރިވެވަޑައިގެންނެވިއެވެ.