ފިތުރު އީދާއި ގުޅުވައިގެން ފައި މަގުގައި އުޅޭ ގޮތަށް ހަމަޖެއްސި ވަގުތު ވެހިކަލް ދުއްވި 97 މީހަކަށް ފިޔަވަޅު އަޅާފައިވާކަމަށް ފުލުހުން ބުނެފިއެވެ.
އީދު ދުވަހުގެ މުނާސަބަތުގައި މާލެއާއި ވިލިމާލޭގެ އިތުރުން ހުޅުމާލޭގައި މިއަދު ހަވީރު 4:00 އިން 6:00 އިންޖީނުލީ އުޅަނދުތައް ދުއްވުން އޮތީ މަނާކޮށްފައެވެ.
ފުލުހުން ބުނީ ފައިމަގުގައި އުޅެން ހަމަޖައްސާފައިވާ ވަގުތުގައި ދުއްވި 461 ވެހިކަލް ޗެކޮކޮށްފައިވާކަށެވެ. އޭގެތެރެއިން 97 މީހުންނަށް ފިޔަވަޅު އަޅާ 364 މީހުންނަށް ނަސޭހަތްދިނުމަށްފަހު ދޫކޮށްލާފައިވާކަމަށް ފުލުހުން ބުނެެެއެވެ.
ޓްރެފިކް އޮޕަރޭޝަނުން ޖުމްލަ 81 އުޅަނދު ބަލާފާސްކޮށް 49 މީހަކަށް ފިޔަވަޅު އަޅާފައިވެއެވެ.
މާފަންނު ޕޮލިސް އިން ޖުމްލަ 7 އުޅަނދެއް ބަލާ ފާސްކުރިއިރު މި ހުރިހާ އުޅަނދަކަށް ވަނީ ފިޔަވަޅު އަޅާފައެވެ. ގަލޮޅު ޕޮލިސް އިން 336 އުޅަނދެއް ބަލާ ފާސްކޮށް ޤަވައިދާ ހިލާފުވި 34 ފަރާތަކަށް ވަނީ ފިޔަވަޅު އަޅާފައެވެ.
އެންވަރަމެންޓް ޕޮލިސްވެސް ވަނީ ޖުމްލަ 7 އުޅަނދެއް ބަލާ ފާސްކޮށް އެ ހުރިހާ އުޅަނދަކަށް ވަނީ ފިޔަވަޅު އަޅާފައެވެ.
މަނާ ވަގުތު ދުއްވާ ފަރާތްތައް 750 ރުފިޔާއިން ޖޫރިމަނާ ކުރާނެކަން ޓްރާންސްޕޯޓް އޮތޯރޮޓީން ބުނެއެވެ.
މި ފަހަރުގެ ފިތުރު އީދު ވިއްސާރަ ދުވަހަކާއި ދިމާވި ނަމަވެސް ފައިމަގުގައި އުޅެން ހަމަޖެއްސި ވަގުތު ގިނަ ބަޔަކު ތުއްތު ކުދިންނާއި އެކު މަގުތަކަށް ވަނީ ނުކުމެފައެވެ.
