ހުސްވެފައިވާ ޔުވެންޓަސްގެ ކޯޗުކަމުގެ މަގާމަށް ޝައުގުވެރިކަމެއް ނެތްކަމަށް ޗެލްސީގެ ކޯޗު މައުރީޒިއޯ ސާރީ ބުނެފިއެވެ.
ޔުވެންޓަސްގެ ކޯޗުކަމުން މަސިމިލިއާނޯ އެލެގްރީ ވަކިކުރިފަހުން އެ މަގާމަށް ގެންނަން ޔުވެންޓަސްގެ މެނޭޖުމަންޓުން ބޭނުންވާ ކޯޗުންގެ ތެރޭގައި ސަރީ ހިމެނެއެވެ. އިޓަލީގެ މީޑިޔާތަކުން ރިޕޯޓްކުރާ ގޮތުން މިދިޔަ ހަފްތާގައި ސަރީގެ އޭޖެންޓާއި ޔުވެންޓަސްގެ އޮފިޝަލުންވަނީ ބައްދަލުވެސްކޮށްފައެވެ.
މިކަމާއި ގުޅޭގޮތުން ވާހަކަދައްކަމުން ސަރީ ބުނީ ޔުވެންޓަސްއަކީ ދުނިޔޭގެ ބޮޑު ކުލަބެއްކަމަށާއި، އެހެންނަމަވެސް ޗެލްސީ ދޫކޮށްލުމުގެ ވިސްނުމެއް ނެތްކަމަށެވެ.
ޕްރިމިއަރ ލީގުގެ ފޯރިއާއި ފެންވަރަށް ބަލާއިރު މި ލީގުގައި މަޑުކުރަން ބޭނުންވާކަމަށް އޭނާ ބުންޏެވެ. ކުލަބުގެ ބައެއް ކުޅުންތެރިންނާއި ސަރީއާއި ގުޅުން ގޯސްވެފައިވާކަމަށް މީޑިޔާތަކުގައި ދެކެވޭ ވާހަކަވެސް ސަރީވަނީ ދޮގުކޮށްފައެވެ.
ސަރީ ބުނީ ޗެލްސީގައި އެއްވެސް ކުޅުންތެރިއަކު ހިތްހަމަ ނުޖެހިގެން ނޫޅޭކަމަށާއި، ކުލަބު އޮތީ ރަނގަޅު ހާލަތުގައިކަމަށެވެ. އަދި މިރޭ ކުލޭ ޔޫރޮޕާ ލީގުގެ ފައިނަލަށް ޓީމު އޮތީ ފުރިހަމައަށް ތައްޔާރުވެފައިކަމަށް އޭނާ ބުންޏެވެ.