އޭސީ މިލާންގެ ކޯޗުކަމުން އިސްތިއުފާދޭން ގެނާރޯ ގަޓޫސޯ ނިންމައިފިއެވެ.
މިދިޔަ އަހަރު އޭސީ މިލާނާއި ހަވާލްވި ގަޓޫސޯވަނީ ކުލަބާއިއެކު ރަނގަޅު ނަތީޖާތަކެއް ނެރެފައެވެ. އެހެންނަމަވެސް ޕޮއިންޓެއްގެ ތަފާތުން އެކުލަބަށްވަނީ ގަދަ ހަތަރެއްގެ ފުރުސަތު ގެއްލިފައެވެ.
41 އަހަރުގެ ކޯޗު މަގާމުން އިސްތިއުފާދޭން ބޭނުންވާކަން އިއުލާންކުރަމުން ބުނީ މިލާން ދޫކޮށްލުމަކީ އަބަދުވެސް އޭނާއަށް އެންމެ އުނދަގޫ ނިންމުންކަމަށާއި، ކުލަބާއިއެކު ހޭދަކުރި 18 މަހަކީ ހަނދާނުންވެސް ފޮހެނުލެވޭނެ ދުވަސްތަކެއްކަމަށެވެ.
ގަޓޫސޯ މިލާނާއިއެކު ހަދާފައިވާ ކޮންޓްރެކްޓް ހަމަވަނީ 2021ވަނަ އަހަރެވެ.
ދެ އަހަރު ކުރިން ކުލަބު ދޫކޮށްލަނީ ކީއްވެތޯ އެހުމުން ގަޓޫސޯ ބުނީ މިއީ މިވަގުތަށް އެންމެ ރަނގަޅު ބަދަލްކަމަށާއި، އޭނާ ކުލަބާއި މެދު ހުންނަ ލޯތްބާއި ޖޯޝާއި ފޯރީގެ ސަބަބުން މެޗުތަކުގައި މާ ބޮޑަށް ޕްރެޝަރަށްދާކަމަށެވެ. އަދި މިދިޔަ 18 މަސްދުވަހު އޭނާއަށް ހަމަ ނިދި ލިބުނީވެސް މަދު ފަހަރެއްގައިކަމަށް ގަޓޫސޯ ބުންޏެވެ.
އޭސީ މިލާނުން މިހާރުވަނީ އާ ކޯޗެއް ހޯދުމުގެ މަސައްކަތްފަށާފައި. އެކުލަބު ހަވާލުކުރާނެކަމަށް ބެލެވެނީ އިޓަލީގެ ކޯޗަކަށް ކަމަށް ބެލެވެއެވެ.