މިދިޔަ އަހަރުގެ ވިޔަފާރީގެ ފައިދާއިން ހިއްސާދާރުންނަށް ބެހުމަށް ފާސްކުރި ހިއްސާގެ ފައިދާ އަންނަ ބުރާސްފަތި ދުވަހުން ފެށިގެން ދޫކުރަމުންދާނޭކަމަށް އެސްޓީއޯއިން ހާމަކޮށްފިއެވެ.
އެސްޓީއޯއިން ބުނީ، މެއިމަހުގެ 16 ވަނަ ދުވަހުގެ ރޭ ބޭއްވި އެސްޓީއޯގެ 2018 ވަނަ އަހަރުގެ އަހަރީ އާއްމު ޖަލްސާގައި ހިއްސާއަކަށް ބެހުމަށް ފާސްކުރި 58 ރުފިޔާ، އަންނަ ބުރާސްފަތި ދުވަހުން ފެށިގެން އެސްޓީއޯގެ މައި އޮފީހުން ދޫކުރަމުންދާނޭ ކަމަށެވެ.
ހިއްސާގެ ފައިދާ ނެގުމަށް އަންނަ ފަރާތްތަކުން އައިޑީކާޑު، ނުވަތަ ހިއްސާގެ ސެޓްފިކޭޓް ގެންނަންޖެހޭނޭކަމަށް އެސްޓީއޯއިން ބުނެއެވެ. ހިއްސާގެ ފައިދާ ބޭންކް އެކައުންޓަށް ޖަމާކުރުމަށް މިހާރު ރަޖިސްޓްރީކޮށްފައިވާ ފަރާތްތަކުގެ ބޭންކް އެކައުންޓްތަކަށް މެއިމަހުގެ 23 ވަނަ ދުވަހުގެ ނިޔަލަށް ފައިސާ ޖަމާކޮށްދޭނޭކަމަށްވެސް އެސްޓީއޯއިން ބުނެއެވެ.
އެސްޓީއޯ ގްރޫޕަށް 2018 ވަނަ އަހަރު ޖުމްލަ އާމްދަނީގެ ގޮތުގައި 9.4 ބިލިއަން ރުފިޔާ ލިބިފައިވާއިރު، މި މުއްދަތުގެ ތެރޭގައި ސާފްފައިދާގެ ގޮތުގައި ލިބިފައިވަނީ، 224 މިލިއަން ރުފިޔާއެވެ.