އަލްފަތުހު ގްރޫޕުން ބަދަލު ނުދީ ތިބި މީހުން އެ މަޢުލޫމާތު ފުލުހުންނާ ހިއްސާކޮށްދިނުމަށް އެދިއްޖެ
އަލްފަތުހު އެންޑް ޢުމްރާ ގްރޫޕުން ޙައްޖަށް ގެންގޮސްދޭނެކަމަށްބުނެ ފައިސާ އަތުލި މީހުންގެ ތެރެއިން މިހާތަނަށް ބަދަލު ނުލިބޭ މީހުން އެކަމުގެ މަޢުލޫމާތު މޯލްޑިވްސް ޕޮލިސް ސަރވިސްއާ ހިއްސާކުރުމަށް ޕްރޮސިކިއުޓާ ޖެނެރަލް (ޕީޖީ) އޮފީހުން އެދިއްޖެއެވެ.
ޕީޖީ އޮފީހުން ނެރުނު ބަޔާނެއްގައި ވިދާޅުވެފައިވަނީ، ދިވެހިރާއްޖެއިން ޙައްޖަށް މީހުން ގެންދިއުމާބެހޭ އުސޫލާ ޚިލާފަށް ގިނަ ޢަދަދެއްގެ މީހުންގެ އަތުން މަކަރާއިޙީލަތުން ގިނަ ޢަދަދެއްގެ ފައިސާ ނަގައި އެފައިސާއަށް ޚިޔާނާތްތެރިވެފައިވާކަމަށް ތުހުމަތުކުރެވޭ މައްސަލައާ ގުޅިގެން، އަލްފަތުހު އެންޑް ޢުމްރާ ގްރޫޕުގެ މެނޭޖިންގ ޑިރެކްޓަރ މުސްތަފާ މުޙައްމަދުދީދީއާ ދެކޮޅަށް ކުރިމިނަލް ކޯޓަށް ހުށަހެޅި މަކަރާއިޙީލަތްހެދުމުގެ ކުށުގެ ދަޢުވާ، އޭނާގެ މައްޗަށް ސާބިތުނުވާކަމަށް އެ ކޯޓުން ކުރި ޙުކުމް، ހައިކޯޓުގައި އިސްތިއުނާފްކޮށްފައިވާ ކަމަށެވެ.
އަދި މިމައްސަލައަކީ މުޅި މުޖުތަމައާއި ގުޅުންހުރި މައްސަލައަކަށްވެފައި، ގެއްލުމުގެ ބަދަލު ނުލިބޭ އެތައް ބަޔަކު ތިބުމާއެކު އެ ފަރާތްތައް ހޯދުމަށް ފުލުހުން މިހާތަނަށް ކުރި މަސައްކަތުން އަދިވެސް ބައެއް ފަރާތްތަކާ ގުޅިފައި ނުވާކަމަށެވެ. އެހެންކަމުން މި މައްސަލައިގައި ބަދަލު ލިބެންޖެހޭ ފަރާތެއް ވާނަމަ މިމަހުގެ 30ވަނަ ދުވަހުގެ ކުރިން އެ މަޢުލޫމާތު ފުލުހުންނާއި ހިއްސާ ކުރުމަށް ޕީޖީ އޮފީހުން ނެރުނު ބަޔާނުގައި ވަނީ އެދިފައެވެ.
މިކަމާ ގުޅޭ މަޢުލޫމާތު ހިއްސާކުރުމަށް މޯލްޑިވްސް ޕޮލިސް ސަރވިސްގެ ނަންބަރު 9790048 އަށް ގުޅުމަށްވެސް މި ބަޔާނުގައި އެދިލައްވާފައިވެެއެވެ.