އެފްއޭއެމްގެ މުވައްޒަފުންނަށް މިދިޔަ މަހުގެ މުސާރައާއި ރޯދަ އިނާޔަތް ނުދޭކަމަށްބުނެ އެއިދާރާގެ މުވައްޒަފުން ކަންބޮޑުވުން ފާޅުކޮށްފިއެވެ.
އެފްއޭއެމްގެ އިސް މުވައްޒަފަކުވަނީ އެކުންފުނީގެ މުވައްޒަފުންނަށް ރަމަޟާން މަހުގެ އިނާޔަތް ނުލިބޭކަން ޕީއެސްއެމް ސްޕޯޓްސްއަށް ކަށަވަރުކޮށްދީފައެވެ. ނަން ނުޖެހުމަށް ޝަރުތުކޮށް އެ މުވައްޒަފު ބުނީ ރޯދަ މަހުގެ ހަވަނަ ދުވަހާއި ހަމައަށް އިނާޔަތް ނުލިބުމަކީ ހިތާމަކުރާކަމެއްކަމަށާއި، އެލަވަންސް ދިނުމަށް މާބޮޑު ފަރުވާލެއްވެސް އެފްއޭމްގެ މެނޭޖުމަންޓުގައި ނެތްކަމަށެވެ.
ރާއްޖޭގެ އެންމެ ބޮޑު ކުޅިވަރު އެސޯސިއޭޝަނުގެ މުވައްޒަފުންނަށް ރަމަޟާން އެލަވަންސާއި ގުޅޭގޮތުން އެފްއޭއެމްގެ ޖެނެރަލް ސެކެޓްރީ ހުސައިން ޖަވާޒް ވިދާޅުވީ އެއްވެސް މުވައްޒަފަކަށް ދޭންޖެހޭ މުސާރައެއްވިޔަސް އަދި އިނާޔަތެއްވެސް ނުދީ ނޯންނާނެކަމަށާއި، އެއީ ދޮގު ވާހަކަތަކެއްކަމަށެވެ.
އެފްއޭއެމްގައި 84 މުވައްޒަފުން ތިބޭއިރު އޭގެ ތެރެއިން 40 މުވައްޒަފުންނަނަކީ އަތޮޅުތަކުގައި މަސައްކަތްކުރާ މުވައްޒަފުންނެވެ. ޖަވާޒް ވިދާޅުވީ އަތޮޅުތަކުގައި ތިބި މުވައްޒަފުންވެސް އަދި މާލޭގައި ތިބި މުވައްޒަފުންގެވެސް މުސާރައާއި އިނާޔަތްތައް ނުދީ ނޯންނާނެކަމަށެވެ.
އެފްއޭއެމްގެ އިދާރީކަންކަމަށް މިއަހަރު ބަދަލްތަކެއް އަންނަމުންދާއިރު، ކުރިން އެއިދާރާގެ މުބާރާތްތަކާއި ބެހޭ ޑިޕާޓްމެންޓްގެ އިސްވެރިއްގެ ގޮތުގައި މަސައްކަތްކުރި ނާޖީ ނައީމާއި ހެޑް އޮފް ޕްރޮޖެކްޓްސް މުޙައްމަދު ނާސިރު (ނާބެ)ވެސް ދާދިފަހުންވަނީ މަގާމުން ވަކިކޮށްފައެވެ.