ޗެމްޕިއަންސް ލީގުގެ ސެމީ ފައިނަލް ދެވަނަ ލެގުގައި ބާސެލޯނާއާއި ދެކޮޅަށް ފޯވާޑް މުހައްމަދު ސަލާއަށް ނުކުޅެވޭނެކަމަށް ކޯޗު ޔާގެން ކްލޮޕް ބުނެފިއެވެ. މުހިންމު ފޯވާޑް ސަލާއަށް އަނިޔާވީ އެންމެ ފަހުން ޕްރިމިއަރ ލީގުގައި ނިއުކާސަލް ޔުނައިޓެޑާއި ދެކޮޅަށް ކުޅުނު މެޗުގައިއެވެ. މި މެޗުގައި ސަލާގެ ބޮލަށް ލިބުނު އަނިޔާގެ ސަބަބުން އޭނާ ބަދަލުކުރަން ޖެހުނުއިރު، ސަލާއަށް މި މެޗުގައި ނުކުޅެވުމަކީ ކޯޗު ކްލޮޕަށް ލިބޭނެ ބޮޑު ނުތަނަވަސްކަމެކެވެ.
ކްލޮޕް ބުނީ ސަލާއަށް ބާސެލޯނާއާއި ދެކޮޅަށް ނުކުޅެވުނުކަމުގައިވިޔަސް ލީގުގައި އެޓީމް ކުޅޭ އެންމެ ފަހު މެޗުގައި ސަލާ ފެނުމުގެ ފުރުސަތު ބޮޑުކަމަށެވެ. ސަލާގެ އިތުރުން ރޮބާޓޯ ފިރްމީނޯ އަދި ނަބީ ކެއިތާއަށްވެސް އަނިޔާގެ ސަބަބުން ބާސެލޯނާ މެޗުގައި ނުކުޅެވޭނެއެވެ. މި 3 ކުޅުންތެރިންގެ ބަދަލުގައި ކޯޗު ކްލޮޕް ބާސާ މެޗަށް ނެގި ސްކޮޑުން ފުރުސަތުދިނީ ޒުވާން ކުޅުންތެރިންނަށެވެ. މިގޮތުން އުއްމީދީ ތަރި ރިއަން ބްރިއުސްޓަރއަށް މެޗުން ފުރުސަތުދޭނެކަމަށް ކޯޗު ބުނިފިއެވެ.
މީގެ އިތުރުން ޑިފެންޑަރ ވާޖިލް ވެންޑައިކާއި، އޮކްސްލޭޑް ޗެމްބަލައިންވެސް އެންމެ ފަހުގެ ފަރިތަކުރުންތަކުގައި ބައިވެރިނުވެއެވެ. ކްލޮޕް ބުނީ ލިވަޕޫލަށް ފައިނަލުން ފުރުސަތު ނުލިބުނަސް މުބާރާތުން ކަޓަން ބޭނުންވަނީ ހިތްގައިމު ގޮތަކަށްކަމަށާއި، އެންމެ ފަހު ސިކުންތުކޮޅާއި ހަމައަށްވެސް ކަށިން ހިތްވަރު ނެރޭނެކަމަށެވެ.