ސަތޭކަ ހަތާވިސްވަނަ ސިފައިންގެ ދުވަހުގެ މުނާޞަބަތާ ގުޅިގެން މިއަދު ޖުމްހޫރީ މައިދާނުގައި ބޭއްވި ޑްރިލް ޑިސްޕްލޭގެ ހުށަހަޅައިދިނުން، މިނިސްޓަރ އޮފް ޑިފެންސް، އަލްއުސްތާޛާ މާރިޔާ އަޙްމަދު ދީދީ ބައްލަވާލައްވައިފިއެވެ.
މިއަދު ހަވީރު ޖުމްހޫރީ މައިދާނުގައި ބޭއްވި އެމްއެންޑީއެފް ޑްރިލް ޑިސްޕްލޭގެ ހެވިކަމުގެ ހަރަކާތްތައް ބައްލަވާލެއްވުމަށް ޑިފެންސް މިނިސްޓަރުގެ އަރިހުގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަތީފު ބައިވެރިވެވަޑައިގެންނެވިއެވެ. އަދި ޑްރިލް ޑިސްޕްލޭގެ ހެވިކަން ބަލާލުމަށް ޖުމްހޫރީ މައިދާނަށް، އާންމުންގެ ގިނަ ބަޔަކު ޖަމާވިއެވެ.
ސަތޭކަ ހަތާވިސްވަނަ ސިފައިންގެ ދުވަހާ ގުޅިގެން އެމްއެންޑީއެފް ޑްރިލް ސްކޮޑުން ވަނީ މިހަފުތާގެ ތެރޭގައި ހުޅުމާލެ އާއި ވިލިމާލޭގައި ވެސް ޑްރިލް ޑިސްޕްލޭގެ ހެވިކަން ބާއްވާފައެވެ. އަދި މިއަދު ހަވީރު ޖުމްހޫރީ މައިދާނުގައި ބޭއްވި ޑްރިލް ޑިސްޕްލޭއަށް ޢާންމު ރައްޔިތުންގެ ފަރާތުން ވަރަށް ބޮޑު ތަރުޙީބެއް ވަނީ ލިބިގެން ގޮސްފައެވެ.