އިދިކޮޅު މެންބަރުންނަށް ސަރުކާރާއި ގުޅިގެން މަސައްކަތް ކުރެވިދާނެކަމުގެ ފެހި ސިގްނަލް ރައީސް ވަނީ ދެއްވާފަ- އާދަމް ޝަރީފް
ޤައުމީ މަސްލަޙަތު އިސްކޮށް، ދާއިރާތަކުގެ ކުރިއެރުމަށް ގުޅިގެން މަސައްކަތްކުރެއްވުމުގެ ވިސްނުންފުޅު ރައީސް ޞާލިޙް ގެންގުޅުއްވާކަމަށާއި، އެހެންކަމުން ދާއިރާގެ ކުރިއެރުމަށް މަސައްކަތްކުރުމުގެ ފުރުޞަތު ލިބިގެންދާނެކަމަށް ޤަބޫލުކުރައްވާކަމަށް ކުރީގެ ޑިފެންސް މިނިސްޓަރ އަދި މަޑުއްވަރީ ދާއިރާގެ އިންތިޚާބީ މެންބަރު އާދަމް ޝަރީފު ޢުމަރު ވިދާޅުވެއްޖެއެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން އާދަމް ޝަރީފު އުމަރު ވިދާޅުވީ ދާއިރާގެ ތަރައްޤީއާ ކުރިއެރުމަށް ސަރުކާރާއި ގުޅިގެން މަސައްކަތްކުރައްވާނެކަމަށާއި، އިދިކޮޅު މެންބަރުންނަށްވެސް އެގޮތަށް މަސައްކަތް ކުރެވޭނެކަމުގެ ފެހި ސިގްނަލް ރައީސް ޞާލިޙް ދެއްވާފައިވާކަމަށެވެ.
ރައީސް ޔާމީނުގެ ސަރުކާރުގައި އެންމެ ފަހުން ޑިފެންސް މިނިސްޓަރުކަން ކުރެއްވި އާދަމް ޝަރީފު ވިދާޅުވީ މަޑުއްވަރީ ދާއިރާގެ ގޮނޑި ކާމިޔާބު ކުރުމާގުޅިގެން ރައީސް ޞާލިޙް، އެނާއާ ފޯނުން ގުޅުއްވާ ތަޙްނިޔާ ވިދާޅުވިކަމަށެވެ.
"އަޅުގަނޑުގެ ދާއިރާއަކީ ވަރަށް ބޮޑަށް ތަރައްޤީއަށް ލޯބިކުރާ ބަޔަކު ދިރިއުޅޭ ދާއިރާއެއް. އެހެންވީމައި އެތަރައްޤީއާ ކުރިއެރުމައްޓަކައި ސަރުކާރާއި ގުޅިގެން މަސައަކްތްކުރުމަށް އަޅުނޑަށް ލިބޭ ފެހި ސިގްނަލަކީ، ރައީސް ޞާލިޙަކީ ވަރަށް ބޮޑަށް އިދިކޮޅު ބޭފުޅުންނާއެކުވެސް މަސައްކަތްކުރާނެ ބޭފުޅަކަށްވާތީ. އެހެން މިދެންނެވީ އަޅުގަނޑު ހޮވުނީމައި ރައީސް އަޅުގަނޑަށް ގުޅުއްވައި ތަހްނިޔާ ވިދާޅުވީމައި މިހެން މިދެންވީ" އާދަމް ޝަރީފް އުމަރު ވިދާޅުވިއެވެ.
އާދަމް ޝަރީފު އުމަރު ވިދާޅުވީ 19 ވަނަ ރައްޔިތުންގެ މަޖިލީހުގައި އިދިކޮޅު މެންބަރެއްގެ ގޮތުގައި ހުރެގެން ސަރުކާރު ޖަވާބުދާރީ ކުރުމަށް މުހިއްމު މަސައްކަތްތަކެއް ކުރައްވާނެކަމަށާއި، މަޖިލީހުގައި އިސްކުރާނީ ރައްޔިތުންގެ ނިންމުންތަކާއި ރައްޔިތުންގެ އަޑު ކަމަށެވެ.