ހއ އަތޮޅުން ފެށިގެން ތ އަތޮޅާއި ދެމެދުގެ ރަށްތަކަށް ބޯކޮށް ވާރެވޭހެނެކަމަށް ލަފާކުރެވޭތީ، މޫސުމާއި ބެހޭ ޤައުމީ އިދާރާއިން ވައިޓް އެއަލަރޓް ނެރެފިއެވެ.
މެޓް އޮފީހުން ވިދާޅުވީ ގުގުރުމާއި އެކު ބޯކޮށް ވާރެވެހޭނެ ކަމަށާއި، ވައިގަދަވެ ކަނޑުތައްވެސް ގަދަވާނެ ކަމަށެވެ. އެގޮތުން ވިލާގަނަޑުގައި 40 މޭލަށް ވައިގަދަވާނެކަމަށް މެޓް އޮފީހުންވަނީ ވިދާޅުވެފައެވެ. އަދި ދިޔަވަރު ބޮޑުވާ ވަގުތުގައި އުދަ އެރުންވެސް އެކަށީގެންވާކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއެވެ.
ވޭތުވެ ދިޔަ 24 ގަޑިއިރުވެސްވަނީ ރާއްޖޭގެ ބޮޑު ބަޔަކަށް ވަނީ ވިއްސާރަކޮށްފައެވެ. އަދި ކުރިއަށް އޮތް ސައްވީސް ގަޑިއިރުވެސް ރާއްޖޭގެ އެކި ހިސާބުތަކަށް ވިއްސާރަކުރާނެކަމަށް މެޓް އޮފީހުން ލަފާކުރެއެވެ. މެޓު އޮފީހުން ވިދާޅުވީ ރާއްޖެއަށް މިހާރު ކުރަމުން މިދާ ވިއްސާރައަކީ ދެ މޫސުން ބެދޭ ވިއްސާރަ ކަމަށެވެ.
މިހާރު ކުރަމުންދާ ވިއްސާރައިގައި، މާލެ ސިޓީއަށް ބޯކޮށް ވާރޭވެހި ބައެއް މަގުތަކުގައި ފެންބޮޑުވުމާ ގުޅިގެން، ފެން ހިންދުމުގެ މަސައްކަތް ސިފައިން ވަނީ ކޮށްފައެވެ. ފެންބޮޑުވުމުގެ އިތުރުން، މާލޭ ރާޅުގަނޑު ސަރަޙައްދަށް އުދައިގެ އަސަރުވެސް ކޮށްފައިވެއެވެ.