މާލެ ރާޅުގަނޑު ސަރަޙައްދަށް އުދައަރައި އެސަރަހައްދުގެ މަގުމައްޗައް ވެލިއަރަމުންދާތީ ސާފުކުރުމުގެ މަސައްކަތް ސިޓީ ކައުންސިލުން ފަށައިފިއެވެ.
މިއަދު ހެނދުނުން ފެށިގެން ރާޅުގަނޑު ސަރަޙައްދާއި އެސަރަަޙައްދުގެ މަގު މައްޗައްދަނީ ރާޅު އަރަމުންނެވެ. އަދި ރާޅު އެރުމުގެސަބަބުން ގަލާއި ވެލި އަރައި މަގުގައި ދުއްވާ އުޅަނދުތަކަށްވެސް ވަނީ ދަތިތަކާ ކުރިމަތިވެފައެވެ.
ސިޓީ ކައުންސިލުން ވިދާޅުވެފައިވަނީ މަގުމައްޗައް އަރާފައިވާ ވެލި، އެކައުންސިލްގެ މުވައްޒަފުން މިހާރު ނަގައި އެސަރަޙައްދު ސާފުކުރުން ފަށާފައިވާކަމަށެވެ. ކޮންމެ އަހަރެއްގެވެސް އުދަ އަރާ ދުވަސްވަރު، ލޮނުޒިޔާރަތްކޮޅު ރާޅުގަނޑާ ދިމާއިން މަގުމައްޗައް ވެލި އެރުމުގެ މައްސަލަ ދިމާވެއެވެ.
މި ދުވަސްވަަރު ވިއްސާރަވެ، ކަނޑުގެ ބާނިތައް ބޮޑުވުމުގެސަބަބުން ދިޔަވަރު ބޮޑުވާ ގަޑިތަކުގައި އުދަ އަރާނެކަމަށް މޫސުމާބެހޭ ޤައުމީ އިދާރާއިންވަނީ ލަފާކޮށްފައެވެ. ވޭތުވެދިޔަ ދެތިން ދުވަހު އަތޮޅުތަކުގެ ބައެއް ރަށްރަށަށްވެސް ވަނީ އުދަ އަރާފައެވެ. ނަމަވެސް އުދަ އަރައިގެން އެއްވެސް ރަށަކަށް މާބޮޑު ގެއްލުމެއްވި ކަމުގެ މަޢުލޫމާތު ލިބިފައެއް ނުވެއެވެ.