މަޖީދިއްޔާ ސްކޫލަށް 65 އަހަރުފުރުމުގެ މުސާބަތުގައި އެ ސްކޫލުން ވަޅުވި ޓައިމް ކެޕްސޫލްގެ ހަނދާނުގައި އެ ސްކޫލުގެ އިސް ދަރިވަރުން ހިނގާލުމެއް ބާއްވަން ނިންމައިފިއެވެ.
މިރޭ ބޭއްވުމަށް ހަމަޖެހިފައިވާ މި ހިނގާލުމުގައި މަޖީދިއްޔާ ސްކޫލުގެ އިސް ދަރިވަރުން ހިމެނޭހެން މަޖީދިއްޔާ ސްކޫލް ވަށާ 92 ބުރު ޖެހުމަށް ވަނީ ހަމަޖެހިފައެވެ. މަޖީދިއްޔާ ސްކޫލުގެ ކުރިމަަތިން ފެށުމަށް ހަމަޖެހިފައިވާ މި ހިނގާލުން ފަށާނީ މިރޭ 9:02ގައިކަމަށް މަޖީދިއްޔާ ސްކޫލުގެ އިސްދަރިވަރުން މަޢުލޫމާތުދެއެވެ. މިއަދަކީ މަޖީދިއްޔާ ސްކޫލްގެ 92ވަނަ އަހަރީ ދުވަސްވެސްމެއެވެ.
މަޖީދިއްޔާ ސްކޫލުން 1992ވަނަ އަހަރު ވަޅުލި ކެޕްސޫލަކީ އެ ސްކޫލުގެ 100ވަނަ އަހަރީ ދުވަސްކަމަށްވާ، 2027 ވަނަ އަހަރުގެ އޭޕްރީލްމަހުގެ 18 ވަނަ ދުވަހު ނެގުމަށް ވަޅުލި ކެޕްސޫލްއެކެވެ.
މި ކެޕްސޫލް ވަޅުލާފައިވަނީ، މިހާރުގެ ދަރުމަވަންތަ ހުރި ބިމުގައެވެ. ކެޕްސޫލްއަށް ވީގޮތެއް ބެލުމަށް ސްކޫލްގެ އިސް ދަރިވަރުންގެ އިސްނެގުމުގެދަށުން އިއްޔެވަނީ އެތަން ކޮނެ ބަލާފައެވެ. ކެޕްސޫލްގެ ގޮތުގައި ވަޅުލި ހަމުގައި ހުރި ބައެއް ތަކެތި އެތަނުން ފެނިފައިވެއެވެ. ނަމަވެސް ކެޕްސޫލްގެ ގޮތުގައި ވަޅުލި ހަން ފެނިފައެއް ނުވެއެވެ. ކެޕްސޫލްއަށް ވީގޮތް ހޯދުމަށް އިސް ދަރިވަރުންދަނީ މަސައްކަތް ކުރަމުންނެވެ.
އެގޮތުން ދަރުމަވަންތަ ސްކޫލުގެ މަސައްކަތް ކުރި ސައިޓުން ކަޅު ހަމެއް ފެނުނު ކަމަށާއި، އެ ކަޅު ހަން ތިލަފުއްޓަށް އެއްލާލާފައިވާކަމަށް، ސައިޓުގައި މަސައްކަތްކުރާ ބިދޭސީން ބުނެފައިވާކަމަށް އިސް ދަރިވަރުންވަނީ ބުނެފައެވެ. އެހެންކަމުން އެ ހަން ހޯދުމަށް މަޖީދިއްޔާ ސްކޫލުގެ އިސް ދަރިވަރުން ވަނީ ތލަފުއްޓަށްވެސް ގޮސްފައެވެ.