ހެންވޭރު ހެދި ގޮނޑުދޮށަކީ މާލޭގައި މީހުން މުދަށް އެރޭނެ ޤުދުރަތީ ސަރަޙައްދެއް ނެތުމާއިއެކު، ޢާއްމުން މޫދަށް އެރިލައި ހިތްހަމަޖައްސާލުމަށް އޭރުގެ ސަރުކާރުން ހެދިތަނެކެވެ. އޭގެފަހުން ހެންވޭރު ހެދިގޮނޑުދޮށް ވެފައިވަނީ މާލޭގައި ދިރިއުޅޭ މީހުން ކޮންމެ ދުވަހަކުހެން ބޭނުންކުރާ ތަނަކަށެވެ. ވަކިން ޚާއްސަކޮށް ހަފްތާ ބަންދުގައި އެތަން އޮންނަނީ ތޮއްޖެހިފައެވެ. ކުޑަކުދިންނާއި އެކި ޢުމުރުގެ މީހުންނާއިއެކު ޢާއިލާތަކުން އުފާވެރި ވަގުތުތަކެއް ހޭދަކޮށްލާ ސަރަޙައްދަކަށް އެތަން އޮތީވެފައެވެ. ދާދިފަހަކާޖެހެންދެން މާލޭގައި އޮތް މިފަދަ ހަމައެކަނި ސަރަޙައްދަކީވެސް މިއެވެ.
އެހެންނަމަވެސް ނިމިދިޔަ ސަރުކާރުގެ ވެރިކަމުގެ ދުވަސްވަރު އެތަން ބެލެހެއްޓުމާއި މަރާމާތުކުރުމަށްވުރެ ބޮޑަށް އިސްކަންދެއްވިތަން ފެނުނީ މާލޭގެ ހުޅަނގުފަރާތުގައި ބޮޑު ހޭދައެއްކޮށްގެން މުޅިން އައު ހެދިގޮނޑުދޮށެއް ހެދުމަށެވެ.
މިއާއެކު ހެންވޭރު ހެދިގޮނޑުދޮށަށް އަޅާނުލައި ދޫކޮށްލާފައި އޮތުމުގެ ނަތީޖާއަކަށްވީ އެތަން އެއްދުވަހުން އަނެއްދުވަހަށް ހަލާކުވެ ވީރާނާވެގެން ދިއުމެވެ. މޫދަށް އެރުމަށް ބޭނުންކުރާ ސަރަޙައްދު ޢާއްމުން ބޭނުންކުރަމުން ދިޔަނަމަވެސް ފަހަކަށްއައިސް އެތަން ފެނުނީ ކުނިބުނިން ފުރިފައިވާ ހަޑި ސަރަޙައްްދެއްގެގޮތުގައެވެ. އެސަރަޙައްދަކީ އެމީހަކު ބޭނުންގޮތަށް އެއްގަމު އުޅަނދު ޕާކުކޮށް ބޭނުންކަމެއް ކުރަން އޮތްތަނަކަށް އޮތީ ބަދަލުވެފައެވެ.
އެހެންނަމަވެސް މިތަން އަލުން ޒަމާނީ ފެންވަރަށް ތަރައްޤީކުރުމުގެ ޕްލޭނެއް އޮތްކަމަށް ކުރީގެ ސަރުކާރުން ވިދާޅުވަމުންދިޔައެވެ. އެވިދާޅުވާ ޕްލޭނުގެ ދަށުންކަމަށް ވިދާޅުވެ އެސަރަޙައްދުގައުހުރި ކެފޭ، ރެސްޓޯރެންޓްތައް ހުސްކޮށް އެތަނުގައު ހުރި ސްޓޭޖުވެސް ތަޅާލައި ހުސްކުރިއެވެ. އަދި ދުވަސްކޮޅަކަށް އެސަރަޙައްދުން ބައެއް ބަންދުވެސްކުރިއެވެ. އެހެންނަމަވެސް ތަރައްޤީގެ އެއްވެސް މަސައްކަތެއް އެތަނުގައި ނުކުރެއެވެ.
ރައީސް އިބްރާހީމް މުޙައްމަދު ޞާލިޙުގެ ސަރުކާރު ވެރިކަމާ ޙަވާލުވުމަށްފަހު، ސަރުކާރުގެ ހިންގުމަށާއި، ލޯކަލް ކައުންސިލްތަކުގެ ހިންގުމައި ބާރުތަކަށް ބަދަލުތަކެއް ގެންނެވިއެވެ. އެއާއެކު މާލޭ ސިޓީކައުންސިލަށްވެސް މާލޭގައި މިފަދަ ކަންކަން ހިންގުމާއި، ތަރައްޤީކުރުމުގެ ބާރު ލިބިދެއްވިއެވެ. މި ބަދަލާއެކު ހެންވޭރު ހެދިގޮނޑުދޮށް ތަރައްޤީކުރާނެ ގޮތުގެ އައު ޕްލޭނެއް ސިޓީކައުންސިލުންވަނި ހައްދާވާފައެވެ. އަދި އެޕްލޭނުގެދަށުން ހެންވޭރު ހެދިގޮނޑުދޮށް ތަރައްޤީކުރުމުގެ މަސައްކަތްވެސް މިހާރުވަނީ ފަށާފައެވެ.
ޕްލޭނިންގ މިނިސްޓްރީއާއި ސިޓީ ކައުންސިލު ގުޅިގެން ހަދާފައިވާ މިޕްލޭނަށް ބަލާއިރު، ހެދިގޮނޑުދޮށް ތަރައްޤީވެގެން އަންނާނީ، "ބީޗް ތީމަށް"ހަދާ ފެހި ޕާކެއްގެ ގޮތުގައެވެ. އެތަނުގައި ޢާއްމުންނަށް ބޭނުންވާނެ ގިނަ ވަޞީލަތްތައް ހުންނާނެގޮތަށް ޕްލޭނުގައި އެކަން ހިމަނުއްވާފައިވެއެވެ.
އެސަރަޙައްދުގެ ދެދިމާއެއްގައި ޖޯއްޔާއި އުނދޯއްޔާއެކު މައިޒާންތަކެއް ހެދުމަށްވަނީ ނިންމާފައެވެ. އަދި މޫދަށް އެރޭ މީހުންނަށް ތަފާތު ތަޖުރިބާއެއް ކޮށްލުމުގެ ފުރުސަތު ދިނުމުގެގޮތުން މޫދާއި ގުޅޭގޮތަށްތަށް "ވޯޓަރ ސްލައިޑެއް" ބެހެއްޓުމަށްވެސް މިތަނުގެ ތަރައްޤީގެ ޕްލޭންގައި ހިމަނާފައިވެއެވެ. އަދި މޫދަށްއެރޭ މީހުން ފެންވެރުމަށް ޚާއްސަ ފާޚާނަޔާއި، ހެދުން ބަދަލުކުރާނެ ކޮޓަރިއަކާއި، ނުކުޅެދުންތެރިކަން ހުންނަ މީހުންނަށް ޚާއްސަ ވަކި ފާޚާނަތައްވެސް ހުންނާނެއެވެ. މީގެ އިތުރުން އެސަރަޙައްދުގައި މަލްޓި ޕަރޕަސް ސަޓޭޖެއް ހިމެނޭ ބައެއްވެސް އޮންނާނެއެވެ.
ހެންވޭރު ހެދިގޮނޑުދޮށް އަލުން ތަރައްޤީކުރާއިތު ރާއްޖެއަށް މުޅިން އާކަމެއްވެސް ހިމެނެއެވެ. އެއީ "ހެޖް މޭޒް"އެވެ. މިއީ ބަގީޗާ ގަހުން ހަދާފައިވާ ފާރުތަކެއްގެ މައްޗަށް އެކުލެވޭ އެއްކޮޅުން ވަދެވޭގޮތަށް އޮންނަ ތަނެކެވެ. އެތެރެއަށް ވަނުމަށްފަހު ތަފާތު މަގުތައް ހުރިނަމަވެސް އެތަނުން ނުކުމެވޭނީ އެއްމެ މަގަކުންނެވެ.
މިފަދަ ތަފާތު ކަންކަމުގެ މައްޗަށް އެކުލެވޭހެން މިތަން ތަރައްޤީކުރާއިރު، މިތަންތަނަކީ ގިނަ މީހުން އެއްވާ ތަނަކަށް ވާނެތީ ބޮޑު ޕާކިންގ ޒޯނެއްވެސް ހެދުމަށް ހަމަޖެހިފައިވެއެވެ. މިސަރުކާރުގެ ވިސްނުންފުޅުހުރީ ބީޗް ތަރައްޤީކުރާއިރު، ވީހާވެސް ތޮއްޖެހުން ކުޑަކޮށް މީހުންނަށް އުޅޭގޮތަށް، އެތަނުގައި އެއްވެސް ބޮޑު އިމާރާތެއް ނުހިމަނައި، ޖަޒީރާވަންތަ ހިތްގައިމު ސަރަޙައްދަކަށް އެތަން ހެދުމެވެ.
ހެންވޭރު ހެދިގޮނޑުދޮށް ތަރައްޤީ ކުރުމުގެ މަސައްކަތް މިހާރުވަނީ އެމްޓީސީސީއާއި ހަވާލުކޮށް އެތަނުގެ ޢަމަލީ މަސައްކަތްވެސް ފަށާފައެވެ.