މިއަދު އިރު އޮއްސުނު ވަގުތު މަޖީދީ މަގުން ދިޔަ ފުލުހަކަށް މަގުމަތިން ޙަމަލާދީ ޒަޚަމް ކޮށްލައިފިއެވެ.ފުލުހުން ބުނީ މިހާދިސާގައި އަނިޔާ ލިބިފައިވަނީ ވިލިމާލޭ ޕޮލިސް ސްޓޭޝަންގައި މަސައްކަތްކުރާ ޕޮލިސް ސްޓާފް ސާޖަންޓް ޚާލިދު ޢަބްދުﷲ އަށް ކަމަށެވެ.އަދި މިމައްސަލާގައި ތުހުމަތުގައި 40 އަހަރުގެ ދިވެހި ފިރިހެނަކު މިހާރު ވަނީ ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން މައުލޫމާތުދެއެވެ.މިޙަމަލާގައި ލިބުނު އަނިޔާ އަށް ޚާލިދު ޢަބްދުﷲ މިހާރު ގެންދަނީ އައިޖީއެމް ހޮސްޕިޓަލުގައި ފަރުވާ ދެމުންނެވެ. ކޮމިޝަނަރ އޮފް ޕޮލިސް ޙުސައިން ވަޙީދު ވަނީ މިމައްސަލަ ހަރުކަށި ޢިބާރާތުން ކުއްވެރި ކުރައްވާފައެވެ. ޤާނޫނު ތަންފީޒް ކުރުމުގެ މަސައްކަތުގައި ޙަރަކާތްތެރިވާ ފުލުހުންނަށް ޙަމަލާ ދިނުމުގެ ފިނޑި ޢަމަލެއްގެ ސަބަބުން ޤާނޫނު ތަންފީޒްކޮށް ރައްޔިތުންނަށް ރައްކާތެރިކަން ހޯދައި ދިނުމަށް ފުލުހުން ކުރަމުންދާ މަސައްކަތް ހުއްޓުވައި ނުލެވޭނެ ކަމަށާއި ފުލުހުން ރައްޔިތުންގެ ޚިދުމަތުގައި ސާބިތު ކަމާއެކު ދެމި ތިބޭނެ ކަމަށް ކޮމިޝަނަރ ވިދާޅުވިއެވެ.