ކަރަންޓް ސަބްސިޑީއަށް އެދުމުގެ ފުރުސަތު އެއްމަސް ދުވަހަށް ސަރުކާރުން އިތުރުކުރައްވައިފިއެވެ.އެމްބީސީ ނިއުސްއަށް މައުލޫމާތު ދެއްވަމުން އިކޮނޮމިކް ކައުންސިލްގައި ހިމެނި ވަޑައިގަންނަވާ ފިޝަރީޒް މިނިސްޓަރ ޑރ. މުޙައްމަދު ޝައިނީ ވިދާޅުވީ ސަބްސިޑީއަށް އެދުމުގެ މުއްދަތު އިތުރުކުރެއްވީ އިކޮނޮމިކް ކައުންސިލުން އެންސްޕާއާއެކު މަޝްވަރާ ކުރެއްވުމަށްފަހުގައި ކަމަށެވެ.މިނިސްޓަރ ޝައިނީ ވިދާޅުވީ، އެއްމަސްދުވަހަށް މުއްދަތު އިތުރު ކުރި ނަމަވެސް ސަބްސިޑީއަށް އެދުނު ފޯމްތައް ދިރާސާކުރުމަށްފަހު އަނެއްކާވެސް އެފުރުސަތު ހުޅުވާލައްވާނެކަމަށެވެ.މިނިސްޓަރ ވިދާޅުވީ އެއް އިރެއްގައިވެސް ސަބްސިޑީއަށް އެދުމުގެ ފުރުސަތު ބަންދު ނުވާނެކަމަށެވެ. ސަބަބަކީ، މީހެއްގެ ހާލަތު ބަދަލުވާނެ ވަގުތެއް ނޭގޭނެކަމަށާއި، ވަޒީފާއިން ވަކިވެ އާމްދަނީއަށް ބަދަލު އައުމަކީވެސް އެކަށީގެންވާ ކަމެއްކަމަށެވެ. އެގޮތުން ރާއްޖެއިން ބޭރުގައި ދިރި އުޅޭ ފަރާތްތަކަށްވެސް ސަބްސިޑީއަށް އެދުމުގެ ފުރުސަތުވެސް އޮންނާނެކަމަށް މިނިސްޓަރ ވިދާޅުވިއެވެ.މިނިސްޓަރ ވިދާޅުވީ، ސަބްސިޑީ ލިބުން ހައްގު ކޮންމެ ފަރާތަކަށްވެސް އެ ލިބޭނެކަމުގެ ޔަގީންކަން ދެއްވާކަމަށާއި، ސަބްސިޑީ ލިބުން ހައްގު ނޫން ފަރާތްތަކަށް ދެމުން އައި ސަބްސިޑީ ލިބުން ހުއްޓުވޭނެކަމަށެވެ.ކަރަންޓް ސަބްސިޑީއަށް އެދުމުގެ ފުރުސަތު ސަރުކާރުން ހުޅުވާލީ މިދިޔަ ފެބްރުއަރީ މަހުގެ 10 ވަނަ ދުވަހުއެވެ.