މާލޭ ވިޔަފާރި ބަނދަރާއި، ހުޅުމާލެ އިންޓަރނޭޝަނަލް ޓާމިނަލް މާދަމާ ބަންދުވާނޭކަމަށް އެމްޕީއެލްއިން ބުނެފިއެވެ.
މިކަމާއި ގުޅޭގޮތުން މޯލްޑިވްސް ޕޯޓްސް ލިމިޓެޑް، އެމްޕީއެލްއިން ބުނީ، މާލޭ ވިޔަފާރި ބަނދަރާއި، އެމްޕީއެލް ހުޅުމާލެ އިންޓަރނޭޝަނަލް ޓާމިނަލް މާދަމާ ބަންދުކުރުމަށް ނިންމީ، ރައްޔިތުން މަޖިލީހުގެ އިންތިހާބާއި ގުޅިގެންކަމަށެވެ. އެގޮތުން މާދަމާ އަށްފަހު އަންނަ އާދިއްތަ ދުވަހުގެ ހެނދުނު 7:30 ހުން ފެށިގެން ކުރިއެކޭ އެއްގޮތަށް އެމްޕީއެލްގެ ޚިދުމަތްތައް ދެމުންގެންދާނޭކަމަށް އެކުންފުނިން ބުނެއެވެ.
ރައްޔިތުންގެ މަޖިލީހުގެ އިންތިހާބުގެ ވޯޓުލުން ފެށުމަށް ހަމަޖެހިފައިވަނީ މާދަމާ ހެނދުނު 08:30 ގައެވެ. ވޯޓުލުން ނިންމާލުމަށް ކަނޑައަޅާފައިވާ ގަޑިއަކީ 16:00 އެވެ.
މިފަހަރުގެ ރައްޔިތުންގެ މަޖިލީހުގެ އިންތިހާބުގައި 87 ދާއިރާއަކަށް 386 ކެނޑިޑޭޓުން ވާދަކުރެއެވެ. އިންތިހާބުގައި ވޯޓުލުމުގެ ހައްޤު ލިބިފައިވާ މީހުންގެ އަދަދަކީ 264،442 އެވެ.