ހިއުމަން ރައިޓްސް އެމްބެސެޑަރުންގެ ގޮތުގައި އެޗް.އާރް.ސީ.އެމް އިން 4 ބޭފުޅަކު ހަމަޖައްސަވައިފިއެވެ.
ހިއުމަން ރައިޓްސް ކޮމިިޝަން އޮފް ދަ މޯލްޑިވްސް ގައި މިއަދު ބޭއްވި ރަސްމިއްޔާތެއްގައި އެމްބެސެޑަރުންގެ ގޮތުގައި ކަނޑައެޅި ހަތަރު ބޭފުޅުންނާއެކު އެކަމާގުޅޭ އެއްބަސްވުމެއްގައި ވަނީ އެޗްއާރު ސީއެމުން ވަނީ ސޮއިކޮށްފައެވެ. މި ބޭފުޅުންނަކީ އިންސާނީ ހައްޤުތައް ރައްކާތެރިކޮށް، އެކަމާއި ގުޅުންހުރި ދާއިރާ ތަކުގައި ޙިދުމަތް ކުރައްވާފައިވާ ބޭފުޅުންތަކެއް ކަމަށް އެޗްއާރުސީއެމުން ވިދާޅުވެއެވެ.
މި ރަސްމިއްޔާތުގައި ވާހަކަ ދައްކަވަމުން އެޗް.އާރް.ސީ.އެމްގެ ރައީސާ އައިމިނަތު އީނާސް ވިދާާޅުވީ އެ ކޮމިޝަނުން މި ކުރާ މަސައްކަތަކީ މުޖުތަމަޢުގައި ހިނގާ ނޭދެވޭ ކަން ކަމަށް ހައްލު ހޯދުމުގެ މަޤުޞަދުގައި ކުރަމުން އަންނަ ކަމެއް ކަމަށެވެ. އަދި ސަރުކާރާއި އަމިއްލަ ޖަމްޢިއްޔާ ޖަމާޢަތްތަކާއި އާންމު ފަރުދުންގެ އެހީތެރިކަންވެސް މިކަމުގައި ބޭނުންވާ ކަމަށް އީނާސް ވިދާޅުވިއެވެ.
އެޗް.އާރު.ސީއެމުން އެމްބެސެޑަރުން ކަނޑައަޅާފައިވަނީ އަންހެނުންނާއި، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންގެ ހައްޤުތަކުގެ ދާއިރާގެ އިތުރުން ކުޑަކުދިންގެ ހައްގުތަކުގެ ދާއިރާއިންނެވެ.
އެޗް އާރް ސީއެމްއިން ދަނީ އިންސާނީ ޙައްޤުތައް ރައްކާތެރިކޮށް އެ ކޮމިޝަނުން ކުރާ މަސައްކަތްތައް ހަރުދަނާކުރުމަށް ކުރާ މަސައްކަތްތަކުގެ ތެރެއިން އެ ދާއިރާގައި މަސައްކަތްކުރާ އަމިއްލަ ފަރުދުންނަށް ހިތަވަރުދީ އެފަރާތްތަކާއި ގުޅިގެން ގިނަ މަސައްކަތްތަކެއް ކުރަމުންނެވެ.