ކަޅުވަކަރު މިސްކިތް އަލުން ރަވާއި ބަހައްޓަން ކަނޑައަޅާފައިވާ ސަރަޙައްދުގެ ކުރެހުންތައް މިހާރު ނިމިފައިވާކަމަށް މިނިސްޓަރީ އޮފް އަރޓްސް ކަލްޗަރ އެންޑް ހެރިޓޭޖުން ވިދާޅުވެއްޖެއެވެ.
މި ސަރުކާރުގެ ފުރަތަމަ ސަތޭކަ ދުވަހު ކުރަން ނިންމާފައިވާ ކަންކަމުގެތެރޭގައި ހިމެނޭ ކަޅުވަކަރު މިސްކިތް އަލުން ރަވާއި ބެހެއްޓުމުގެ މަސައްކަތުގެ ތެރެއިން މިސްކިތް ބަހައްޓާ ސަރަހައްދާއި ސަލްޓަން ޕާކު ގުޅިގެންދާނެ ވެއްޓެއް ތައްޔާރުކުމުގެ މަސައްކަތް މިހާރުދަނީ ކުރަމުންނެވެ.
ހެރިޓެޖު މިނިސްޓްރީން ވިދާޅުވީ މިސްކިތް ބަހައްޓާ ސަރަހައްދުގައި ކުރިންހުރި ޢިމާރާތުގެ ތަޅުންގަނޑާއި ފައުންޑޭޝަން ނަގައި ސާފުކުރުމުގެ މަސައްކަތް ނިންމާފައިވާ ކަމަށާ، އެސަރަހައްދުގައި ސެކިއުރިޓީ ފެންސް ޖެހުމުގެ މަސައްކަތް މިހާރު ކުރިއަށްދާކަމަށެވެ.
އަދި ކަޅުވަކަރު މިސްކިތުގެ ހިރިގަލުގެ ހުރިހާ ބައިތައް މަރާމާތުކޮށް އާބާތުރަ ފިލުވުމުގެ މަސައްކަތްވެސް މިޙާރު ނިމިފައިވާކަމަށް އެމިނިސްޓްރީން ވިދާޅުވެއެވެ. މީގެ އިތުރުން މިސްކިތުގެ ލަކުޑިއަށް ދޭންޖެހޭ ފަރުވާދިނުމުގެ މަސައްކަތުގެ ހަތްދިހަ އިންސައްތަވަނީ މިހާރުވަނީ ނިމިފައިކަން އެމިނިސްޓްރީން ފާހަގަކުރައްވައެވެ.
ކަޅުވަކަރު މިސްކިތް އަލުން ސަލްޓަން ޕާކު ސަރަޙައްދުގައި ބަހައްޓާނީ އިހުގެ އާސާރީ މިސްކިތެއްގެ ހައިބަތު ފެންނާނެހެން، މީހުންނަށް ނަމާދުކުރެވޭނެ އިންތިޒާމުތަކާވެސްއެކުއެވެ. ކަޅުވަކަރު މިސްކިތް އަލުން ބެހެއްޓުމަކީ، ސަރުކާރުގެ ފުރަތަމަ 100 ދުވަހުގެ ވަޢުދުތަކުގެ ތެރޭގައި ހިމެނޭ ކަމެކެވެ. ކަޅުވަކަރު މިސްކިތް ބަހައްޓާނެ ތަނަކާ ގުޅޭގޮތުން އާންމުންގެ ޚިޔާލު ހޯދުމަށް ސަރުކާރުން ވަނީ ޢާންމުކޮށް ހުޅުވާލައިގެން ފޯރަމެއްވެސް ބާއްވާފައެވެ.