ސައުތު އޭޝިއަން ވައިލްޑްލައިފް އެންފޯސްމެންޓް ނެޓްވޯކް (ސާވަން)ގެ އެގްޒެކެޓިވް ކޮމިޓީގެ ފަސްވަނަ ބައްދަލުވުން ފަށައިފިއެވެ.
މިއަދު ޗަމްޕާ ސެންޓްރަލް ހޮޓަލުގައި ފެށި މިބައްދަލުވުން ފަށްޓަވައިދެއްވީ މިނިސްޓަރ އޮފް ސްޓޭޓް ފޮރ އެންވަޔަރަންމަންޓް ޑރ.ޢަބްދުﷲ ނަސީރެވެ. ސާވަން އަކީ އޭޝިއާ ޤައުމުތަކުގެ ދިރުންތަކާއި ޤާނޫނާ ޚިލާފަށްކުރާ ވިޔަފާރީގެ މުޢާމަލާތްތައް ބެލެހެއްޓުމަށް ކަނޑައަޅާފައި އޮންނަ ޖަމްޢިއްޔާއެކެވެ.
ސާވަންގެ މައިގަނޑު މަޤްސަދަކީ އެއްޤައުމުން އަނެއްޤައުމަށް ކުރެވޭ ވައިލްޑްލައިފް ޓްރޭޑްތަކާއި އެޤައުމެއްގެ ޙިމާޔްތްކޮށްފައިހުރި ދިރުންތަކުން ކުރެވޭ ވިޔަފާރިތައް ހުއްޓުވައި މިކަހަލަ މަޢުލޫމާތު ކަމާގުޅުންހުރި ޤައުމުތަކާ ހިއްސާކުރުމެވެ.
އެންވަޔަރަންމަންޓަލް ޕްރޮޓަކްޝަން އޭޖެންސީގެ ސީިނިއަރ އެންވަޔަރަމަންޓް އެނަލިސްޓް އަހްމަދު ޝާން ވިދާޅުވީ މިއަހަރުގެ ބައްދަލުވުމުގައި ފާއިތުވި އަހަރުގައި ކުރެވުނު ކަންތައްތަކާގުޅޭގޮތުން މަޝްވަރާކުރަން ނިންމާފައިވާކަމަށެވެ. އަދި ކުރިއަށްއޮތް އަހަރުގައި ކުރާނެ ކަންކަމާގުޅޭގޮތުންވެސް މަޝްވަރާކުރަން ނިންމާފައިވާކަމަށްވެސް އޭނާ ވިދާޅުވިއެވެ.
އެއްދުވަހުގެ މުއްދަތައް ކުރިއަށްދާ މިބައްދަލުވުގައި ކުރިއަށްއޮތް އަހަރުގައި ބައްދަލުވުން ބާއްވާނެ ދުވަހާއި ތަނެއްވެސް ކަނޑައެޅިގެންދާނެ ކަމަށް އޭނާ ވިދާޅުވިއެވެ. ކޮންމެ އަހަރަކުވެސް ބާއްވަމުން އަންނަ މި ބައްދަލުވުން މިއަހަރު ކުރިއަށް ދާނީ ރާއްޖޭގައެވެ. މި ބައްދަލުވުމުގައި ސާކުގެ ޤައުމުތަކުން ބައިވެރިވާނެއެވެ.