ދިވެހިބަހުގެ އެކެޑަމީން އިސްނަގައިގެން އަލްޤާޟީ ޙަސަން ތާޖުއްދީންގެ ވާދައިގެ ތައްޓަށް ބާއްވާ ޤައުމީ ތާރީޙު ސުވާލު މުބާރާތް ފަށައިފިއެވެ.
ކުރީގެ އެމްއީއެސް ހޯލުގައި، މުބާރާތް ފެށުމަށްޓަކައި ބޭއްވޮ ރަސްމިއްޔާތު ޝަރަފުވެރި ކޮށްދެއްވީ ރައީސުލް ޖުމްހޫރިއްޔާގެ އޮފީހުގެ މިނިސްޓަރ އަހުމަދު ނަސީމެވެ. މި ރަސްމިއްޔާތުގައި ވާހަކަފުޅުދައްކަވަމުން ނަސީމް ވިދާޅުވީ ރާއްޖޭގެ ރަށްރަށުގައި ހުރި ތާރީޚީ ތަންތަން ޙިމާޔަތްކުރުމަކީ ކޮންމެހެން ކުރަންޖެހޭ ކަމެއްކަމަށެވެ. އަދި ރާއްޖޭގެ އެކިކަންކޮޅުތަކުގައި ހުރި އާސާރީ ތަންތަނުގެ ތެރެއިން ވިރާނާވެ ހަލާކުވަމުންދާ ތަންތަން މަރާމާތުކޮށް އެތަންތަނަށް ދޭންޖެހޭ "ފަރުވާ" ވީހާވެސް އަވަހަކަށް ދޭންޖެހޭކަން އޭނާ ފާހަގަކުރެއްވިއެވެ.
ރާއްޖޭގެ ތާރީޚު ޙިމާޔަތްކޮށް ރައްކާތެރިކުރުމަށް މިސަރުކާރު އިސް ވެރިންނާއި ޚުދު ރައީސުލް ޖުމްހޫރިއްޔާ އިބްރާހީމް މުޙަންމަދު ސާލިޙްވެސް ވަަރަށްބޮޑު އިސްކަމެއް ދެއްވާކަމަށް ނަސީމް ވިދާޅުވިއެވެ.
އަޑު: ރައީސުލް ޖުމްހޫރިއްޔާގެ އޮފީހުގެ މިނިސްޓަރ އަހުމަދު ނަސީމް
މި ރަސްމިއްޔާތުގައި ވާހަކަ ދައްކަވަމުން ދިވެހިބަހުގެ އެކެޑަމީގެ ރައީސް އަޝްރަފް ޢަލީ ވިދާޅުވީ މިފަދަ މުބާރާތެއް ކުރިއަށް ގެންދިއުމުގެ މަޤުސަދަކީ ދަރިވަރުންގެ ހިތްތަކުގައި ތާރީޚަށް ލޯބި ޖައްސުވައި ތާރީޚު އުނގަންނައި ދިނުން އިތުރުކުރުންކަމަށެވެ. ދަރިވަރުން ފުރާވަރަށް އެރުމުގެކުރިން އެދަރިވަރުންނަށް ތާރީޚު ދަސްކޮށްދީ ތާރީޚައް ލޯބި ޖެއްސުވުމަކީ ކޮންމެހެން ކުރަންޖެހޭ ކަމެއްގެގޮތުގައި އަޝްރަފް ފާހަގަކުރެއްވިއެވެ.
އަޑު:އަޝްރަފް
އަހަރުން އަހަރަށް ޤައުމީ ތާރީޙު ސުވާލު މުބާރާތަށް ލިބެމުންދާ ތަރުޙީބުން ދޭހަކޮށްދެނީ މިހާރުވެސް ދިވެހި ދަރިން ދިވެހިތާރީޚަށް ދޭ އަހަންމިއްޔަތާއި ލޯބި ކަން އަޝްރަފް ފާހަގަކުރެއްވިއެވެ.
ރާއްޖޭ ހުރިހާ ރަށެއްގެ ސްކޫލްތަކަށް އާންމުކޮށް ހުޅުވާލައިގެން ފެށި މިމުބާރާތުގައި ގިނަޢަދަދެއްގެ ދަރިވަރުން ވަނީ ބައިވެރިވެފައެވެ. ޖުމުލަ 20 ސްކޫލަކުން މިފަހަރުގެ މުބާރާތުގައި ބައިވެރިވެއެވެ. އެކި ޢުމުރުފުރާތަކަށް ބަހާލައިގެން ކުރިއަށްގެންދާ މިމުބާރާތް ކުރިއަށްދާނީ 5 ދުވަހުގެ މުއްދަތަަށެވެ. މިއީ މިދިޔަ އަހަރު ބާއްވަންފެށި މުބާރާތެކެވެ.