މުޖުތަމައުގެ މައްސަލަތައް ހައްލުކުރުމުގައި ޖަމިއްޔާތަކުގެ ދައުރު ވަރަށް ބޮޑު - މިނިސްޓަރ ވަހީދު
މުޖުތަމަޢުގައި ދިމާވާ މައްސަލަތައް ޙައްލުކުރުމަށް ޖަމިއްޔާތަކަކީ ވަރަށް މުހިންމު ދައުރެއް އަދާކުރާ ބައެއް ކަމަށް އެކްޓިން މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަލީ ވަހީދު ވިދާޅުވެއްޖެއެވެ.
މިނިސްޓަރ ޢަލީ ވަޙީދު ވަނީ ޖަމިއްޔާތައް ބާރުވެރިކޮށް އެއް ޖަމިއްޔާ އަނެއް ޖަމިއްޔާގެ ގުޅުން ބަދަހި ކުރުވުމުގެ މަޤްޞަދުގައި ކުރިއަށްގެންދިޔަ ހަވަލި ފެއަރ އަށް ވަޑައިގެން ޖަމިއްޔާތަކާއި ބައްދަލުކުރައްވާ، ސްޓޯލްތަކަށް ޒިޔާރާތް ކުރައްވާފައެވެ. މި ފެއަރ ނިންމާލުމުގެ ގޮތުން ރޭ ދަރުބާރުގޭގައި ވަނީ ބައްދަލުވުމެއް ކުރިއަށް ގެންގޮސްފައެވެ. އެ ބައްދަލުވުމުގެ ތެރެއިން މިނިސްޓަރ ވަހީދު ވަނީ ޖަމިއްޔާތަކާއި ބައްދަލުކޮށް އެމީހުންގެ ކަންބޮޑުވުންތަކާއި ޙިޔާލު އަޑުއައްސަވާފައިވެއެވެ.
ވ. އަތޮޅު ފިޔަވައި ރާއްޖޭގެ ހުރިހާ އަތޮޅެއްގެ މަދަނީ ޖަމިއްޔާތަކުން ބައިވެރިވި މި ފެއަރގެ ބައިވެެރިންގެ ކަންބޮޑުވުންތައް އަަޑުއެއްސެވުމަށްފަހު މިނިސްޓަރ ޖަމިއްޔާތަކުން ދިން ޚިޔާލުތައް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙަށް ހުށަހަޅާނެ ކަމަށެވެ.
މިނިސްޓަރ ވިދާޅުވީ ސަރުކާރުން ޖަމިއްޔާތަކަށް ޙާއްސަ ސަމާލުކަމެއް ދޭކަމަށާއި އަބަދުވެސް ޖަމިއްޔާތަކުގެ އަޑުއަހަމުންދާނެ ކަމަށެވެ.
ޖަމިއްޔާތަކުން އަމާޒުކޮށް މިފަދަ ފެއަރއެއް ބޭއްވުމުގެ މައިގަނޑު މަގްޞަދަކީ ޖަމްޢިއްޔާތަކުން ރާވާ ހިންގުމަށް ކަނޑައެޅޭ ޕްރޮގްރާމްތައް ހިންގުމަށް ފަންޑު ހޯދޭނެ ވަސީލަތެއް ގާއިމްކޮށް، ޕްރޮޖެކްޓްތައް ސްޕޮންސަރ ކުރާނެ ފަރާތްތައް ދެނެގަނެ އެހީހޯދުމަށް މަގުފަހިކުރުމާއި، މެންބަރޝިޕް އިތުރުކުރުމާއި، މަޢުލޫމާތު ހިއްސާކުރުމާއިއެކު ގުޅުން ބަދަހިކުރާނެ ނެޓްވާރކިންގެ މާހައުލެއް ގާއިމުކުރުމެވެ.