ދުނިޔޭގެ އަންހެނުންގެ ދުވަސް ފާހަގަކުރަމުންދާތާ މިހާތަނަށް 108 އަހަރުވަނީވެފައެވެ. އެހެންނަނަމަވެސް އަދިވެސް އަންހެހުން ބާރުވެރިކުރުވުމާއި އަންހެނުންނަށް ހަމަހަމަ ފުރުސަތުތައް ލިބިދިނުމުގައި ކުރަންޖެހޭ ކަންކަން މަސައްކަތްތައް ވަރަށްގިނައެވެ.
1911ވަނަ އަހަރުންފެށިގެން އަންހެނުން ބާރުވެރިކުރުމަށް ބައިނަލްއަގުވާމީ ފެންވަރުގައި އަންނަނީ ގިނަގުނަ މަސައްކަތްތަކެއް ކުރަމުންނެވެ. މިދުވަސް ފާހަގަކުރަމުން އަންނަތާ 108 އަހަރު ވެފައިވާއިރު، އަދިވެސް މިދުވަހުގެ މއިގަނޑު މަޤުސަދަކަށް ވެފައިވަނީ މުޖުތަމަޢުގައި އަންހެނުންގެ ދައުރު ފުޅާކޮށް ހަމަހަމަކަން ޤާއިމް ކުރުމެވެ.
މިއަހަރުގެ އަންހެނުންގެ ދުވަސް ފާހަގަކުރަމުންދަނީ "ބެލެންސް ފޯރ ބެޓަރ" މި ޝިޢާރުގެ ދަށުންނެވެ. ދުނިޔޭގެ އެކި ކަންކޮޅުތަކުގައި ބައިނަލްއަގުވާމީ އަންހެނުންގެ ދުވަސް ފާހަގަކުރަމުން އަންނައިރު، ކުރިއަށްވުރެ ބޮޑަށް މުޖުތަމަޢުގައި އަންހެނުންގެ ދައުރު ފުޅާވެފައިވާކަން ފަހަގަކުރެވެއެވެ.
ކޮންމެ އަހަރެއްގެވެސް މާޗު މަހުގެ 8ވަނަ ދުވަހަކީ ބައިނަލްއަގުވާމީގޮތުން ފާހަގަކުރަމުން އަންނަ އަންހެނުންގެ ދުވަހެވެ. އަންހެނުންގެ ދުވަހެއް ފާހަގަ ކުރުމުގެ އެންމެބޮޑު އަނެއް ބޭނުމަކީ އެމީހުންނަށް ލިބެންވާ ހައްގުތަކާއި ރައްކާތެރިކަން ކަށަވަރުކޮށްދިނުމަށް ބާރުއެޅުމެވެ. އަންހެނުންގެ ހައްގުތައް ރައްކާތެރި ކުރުމާއި، މަސައްކަތުގެ މައިދާނުގައި އަންހެނުންނަށް ފުރުސަތުތައް ހޯދައިދިނުމުގެ މަސައްކަތްކުރެވެއެވެ. އެހެންނަމަވެސް ކުރިއަށްދާނެ ގިނަ ދާއިރާތަކެއް ހުރެމެ، ކުރިއަށްދިއުމުގައި އަދިވެސް ގިނަ ދަތިތަކެއް އަންހެނުންނަށް ކުރިމަތިވެފައިވާކަމީ ކަންބޮޑުވާންޖެހޭ ހަޤީގަތެކެވެ.
މުޖުތަމަޢުގައި އެކިކަންކަމުގައި އަންހެނުންނަށް ކުރިމަތިވާ ފުރައްސާރައާއި މަލާމާތަކީ އެކަމަށް އެޅިފައިވާ އެންމެ ބޮޑު އެއް ހުރަހެވެ. މުޖުތަމައުގައި އަންހެނުންނަކީ އެއްވެސް ބޭނުމެއް ނުހިފޭ ބައެއްކަމަށް ދެކޭދެކުން ބަދަލުކުރަން ޖެހެއެވެ. ފިރިހެނުންނާ އެއް ހަމައެއްގައި އަންހެނުންނަށްވެސް މަސައްކަތް ކުރެވޭނެކަން އަންހެނުންވަނީ ސާބިތުކޮށްދީފައެވެ.
ދުނިޔޭގައި މީގެކުރިން އަންހެނުންގެ ޙައްޤުތައް ޙިމާޔާތްކުރުމަށާއި ފިރިހެނުންނާއި އަންހެނުންގެ މެދުގައި ކުރާ ތަފާތުކުރުންތައް ކުޑަކުރުމާއި މިކަންކަމަށް އިންސާފުހޯދުމަށް ދަނީ ކުރިން ނުކުރެވޭހާ ބޮޑެތި މަސައްކަތްތަކެއް ކުރަމުންނެވެ. އަންހެނުންގެ ހައްގުތައް ރައްކާތެރި ކުރުމަށް މަސައްކަތް ކުރަމުންދާއިރުވެސް، އަންހެނުންނަށްކުރާ ޖިންސީ ގޯނާއާއި ނަފްސާނީ އަނިޔާތަކަށް ހައްލެއް އެދެވޭ އައިސްފައެއް ނުވެއެވެ.
ދުނިޔޭގެ އެހެން ގައުމުތަކޭ އެއްފަދައިން ރާއްޖޭގައިވެސް މިއަދު ބައިނަލްއަގުވާމީ އަންހެނުންގެ ދުވަސް ފާހަގަ ކުރަމުން އަންނައިރު އަންހެނުންގެ ޙައްޤުތަކަށް ދީފައިވާ އަހަންމިއްޔަތުކަމގެ ވާހަކަ ދެއްކުން މުހިންމެވެ. ވަޒީފާގެ މައިދާނުގައްޔާއި ސިޔާސީ، ތަޢުލީމީ އަދި ވިޔަފާރީގެ ރޮނގުން ކުރިއަށްދިއުމުމުގައި އަންހެނުންނަށް ހުރަހެއްނެތެވެ. ފާހަގަކޮށްލަން ޖެހޭކަމަކީ ތަފާތު ދާއިރާތަކުން ވަޒީފާގެ ފުރުސަތުތައް ހުޅުވާލެވިފައިވާއިރު ހުރިހާ ދާއިރާއެއްގައިވެސް އަންހެނުންގެ ބައިވެރިވުން އިތުރުވަމުންދާކަމެވެ.
އެހެންނަމަވެސް އަދިވެސް މީގެ ބައެއް ދާއިރާތަކުން ކުރިއަށް ދިއުމުގައި ގޭތެރެއާއި ދިރިއުޅުމުގެ ކަންކަމުގައި ކަންކަން ރޭވިފައި ހުންނަގޮތުން އަންހެނުންނަށް ދަތިތައް ކުރިމަތިވެފައިވާކަމެވެ.
މިއަދު އަންހެނުންގެ ދުވަސް ފާހަގަކުރަމުންދާއިރު، ކުރަންޖެހިފައިވާ އެންމެބޮޑު އެއްކަމަކީ އެކިދާއިރާތަކުން ކުރިއަށް ދިއުމުގައި އަންހެނުންނަށް އެމީހުންގެ ދިރިއުޅުމުގެ ކަންކަމުގައި ކުރިމަތިވެފައިވާ ހުރަސްތައް ނައްތާލުންކަން ޤަބޫލުކުރަން ޖެހެއެވެ.