ރާއްޖޭގެ ޤާނޫނުހަދާ މަޖިލީހުގައި އާބާދީގެ ނިސްބަތުން އަންހެނުން ތަމްސީލުކުރެވޭ އުސޫލެއް ޤާއިމްކުރަން ޖެހޭކަމަށް މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވެއްޖެ.
ބައިނަލްއަޤްވާމީ އަންހެނުންގެ ދުވަސް ރާއްޖޭގައި ފާހަގަކުރުމުގެ ގޮތުން ބޭއްވި "ރެހެންދި އެވޯޑް" ދިނުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވީ ތާރީޙު ހެކިދޭގޮތުގައި އަންހެނުންގެ ހައްޤުތައް ރައްކާތެރިކޮށް ހަމަހަމަ ފުރުސަތުތަކެއް ލިބިފައިވާކަން ފެންނަން އެބައޮތްކަމަށެވެ.
އެހެންނަމަވެސް މިއަދު އަލުން އެހައްޤު ހޯދުމަށް ނުކުންނަންޖެހޭކަމީ ވިސްނާ ފިކުރުކުރަންޖެހޭ ކަމަށްވެސް މިނިސްޓަރ ވިދާޅުވިއެވެ. މާލެއަތޮޅު މާފުށީގައި ބޭއްވި ރަސްމިއްޔާތުގައި ވަނީ 10 ކަނަބަލަކަށް ރެހެންދިއެވޯޑް ދީފައެވެ.
މި އަހަރު ރެހްނެދި އެވޯޑް ޙާސިލުކުރެއްވި ކަނބަލުންގެތެރެއިން އަދާކުރާ ވާޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ޚިދުމަތުގެ ދާއިރާއިން އެވޯޑު ލިބުނީ އާމިނަތު މުހަންމަދާއި ނަސްރީނާ ޢަލީއަށެވެ. އިޖުތިމާއީ ދާއިރާއިން އެވޯޑް ހާސިލްކޮށްފައިވަނީ ޢާޝަތު ނާޒިމާއާއި މުއުމިނާ އަދަމާއި ޢާއިޝަތު ލޫބާއާއި އައިޝަތު ޝިރުހާނާއެވެ.
އިޖުތިމާއީ ދާއިރާގެ އިތުރުން އަންހެނުން އާންމުކޮށް ކޮށްނޫޅޭ މަސައްކަތް ނުވަތަ ނޮން ޓްރެޑީޝަނަލް ރޯލްސް ދާއިރާއިން ދެ ބޭކަނބަލަކު އެވޯޑް ހާސިލް ކުރައްވާފައިވެއެވެ. އެއީ މަރިޔަމް ޝިފްޒާން އާއި އާމިނަތު އަޒްކާ ޢާދިލެވެ.
އިޤްތިސާދީދާއިރާއިން އެވޯޑް ހާސިލް ކުރައްވާފައިވަނީ އާމިނާ ކަލޭފާނެވެ. އެމްޕްލޯޔަރސް ކެޓަގަރީން އެވޯޑް ހާސިލް ކުރައްވާފައިވަނީ ސޮސައިޓީ ފޯރ ހެލްތް އެޑިއުކޭޝަން "ޝީ"އެވެ.
"ރެހެންދި" ގެނަމުގައި ސަރުކާރުން އަންހެނުންނަށް ޚާއްޞަ އެވޯޑެއް ދޭން ނިންމީ 2013 ވަނަ އަހަރުގެ ނޮވެމްބަރު މަހުގެ ހަތްވަނަ ދުވަހުއެވެ. އެއާއިއެކު 2014 ވަނަ އަހަރުން ފެށިގެން ކޮންމެ އަހަރަކުވެސް މިއެވޯޑް ސަރުކާރުން އަންނަނީ ދެމުންނެވެ.