މިދިޔަ ހަފްތާގައި އެކަނިވެސް، ޤަވާއިދާ ޚިލާފަށް ޕާކު ކުރި 127 އުޅަނދެއްގައި ސްޓިކަރ ޖަހާފައިވާކަމަށް މޯލްޑިވްސް ޕޮލިސް ސަރވިސް އިން ހާމަކޮށްފިއެވެ.
ޤަވާއިދާ ޚިލާފަށް ޕާކުކުރާ އުޅަނދުތަކުގައި ސްޓިކަރ ޖެހުން މެދުކަނޑާލާފައި އޮތުމަށްފަހު އަލުން ސްޓިކަރ ޖަހަން ފަށާފައިވަނީ މިދިޔަ ހަފުތާގެތެރޭގައެވެ.
އެކްސިޑެންޓުތަކާއި ޓްރެިފް ޤަވާއިދާ ޚިލާފުވާ ފަރާތްތައް އިތުރުވަމުންދާތީ މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ވަނީ ޚާއްޞަ މަސައްކަތްތަކެއް ފަށާފައެވެ. ފުލުހުންގެ ޓްރެފިކް މެނޭޖްމަންޓް ޑިޕާޓްމެންޓުން ހާމަކޮށްފައިވާ މިދިޔަ ހަފްތާގެ ތަފާސް ހިސާބުތަކަށް ބަލާއިރު މި ނިމުނު ފެބުރުއަރީ މަހުގެ 23 ހުން މިމަހުގެ 1 ވަނަ ދުވަހުގެ ނިޔަލަށް 1341 (އެއްހާސް ތިން ސަތެކަ ސާޅީސް އެކެއް) ވެހިކަލް ބަލާ ފާސްކޮށްފައިވެއެވެ. އެގޮތުން މި ފާސްކުރި ވެހިކަލްތަކުގެ ތެރެއިން އެއްގަމު އުޅަނދު ދުއްވުމުގެ ލައިސަންސް ނެތް 258 ފަރާތެއް ފާހަގަކުރެވިފައިވާއިރު، ލައިސަންސް އަތުގައި ނެތް 174 މީހަކު ފާހަގަކުރެވިފައިވާކަމަށް ފުލުހުން ހާމަކުރައްވައެވެ.
މީގެ އިތުރުން މި އުޅަނދުތަކުގެތެރެއިން 74 އުޅަނދެއްގެ އިންޝުއަރެންސްގެ މައްސަލަތައް ހުރި އިރު، އަހރީ ފީ ނުދައްކާ 108 އުޅަނދެއް އަދި ރޯޑް ވާދިނަސް އާއި ގުޅޭ 17 މައްސަލައެއްވަނީ ފެނިފައެވެ.
ފުލުހުން މަޢުލޫމާތުދެއްވާގޮތުގައި ނިމިދިޔަ ހަފުތާގައި، ކަނޑައެޅިފައިވާ ލިމިޓަށްވުރެ ބާރަށް ވެހިކަލް ދުއްވައިގެން 5 އުޅަނދެއް ހުއްޓުވާފައިވާއިރު، ޓްރެފިކްއަށް ކަމޭ ނުހިތުމުގެ ސަބަބުން 47 އުޅަނދެއްވަނީ ހުއްޓުވާފައެވެ. މީގެއިތުރުން 18 އަހަރު ނުފުރޭ 5 ކުއްޖަކު އެއްގަމު އުޅަނދު ދުއްވައިގެންވަނީ ހިފަހައްޓާފައެވެ.
ފުލުހުންގެ ތަފާސްހިސާބު ދައްކާގޮތުން މިދިޔަ ހަފުތާގައި ޖުމުލަ 51 އެކްސިޑެންޓެއް ހިނގާފައިވާއިރު، ޤަވާއިދާ ޚިލާފަށް ޕާކުކޮށްގެން މިދިޔަ ހަފުތާގައި އެކަނިވެސް ޖުމުލަ 127 ސްޓިކަރ ވަނީ ޖަހާފައެވެ. އަދި 17 ކާރާއި 8 ސައިކަލު ޓޯ ކޮށްފައިވާކަމަށްވެސް ފުލުހުން ހާމަކުރައްވައެވެ.
ޤަވާއިދާ ޚިލާފަށް ފާކުކުރާ ވެހިކަލްތަކުގައި ސްޓިކަރ ޖެހުން މެދުކަނޑާލާފައި އޮތުމަށްފަހު އަލުން ސްޓިކަރ ޖަހަން ފަށާފައިވަނީވެސް މިދިޔަ ހަފުތާގެތެރޭގައެވެ. ފުލުހުން މަޢުލޫމާތުދެއްވާގޮތުގައި މިގޮތަށް އަމަލުކުރަން ނިންމެވީ ބައެއް މަގުތަކުގައި ގަވާއިދާ ޚިލާފަށް ޕާކުކުރާ އުޅަނދުތަކުގެ ސަބަބުން ޢާއްމުނަށް އުނދަނގޫވެ އެކަމުގެ ޝަކުވާ ފުލުހުންނަށް ހުށަހަޅަމުންދާތީ އެކަން ހައްލު ކުރުމުގެ ގޮތުންކަމަށެވެ.
އަދި ސްޓިކާ ޖެހުމަށް ނިންމާފައިވަނީ މަގުމަތި ބޭނުންކުރާ މީހުންނަށް ދަތިވާގޮތަށް ޤަވާއިދާ ޚިލާފަށް ޕާކުކުރާ ވެހިކަލްތަކުގައި އެކަނި ކަމަށްވެސް ފުލުހުން ވިދާޅުވެއެވެ. އެގޮތުން މިސްކިތްތަކާއި ހޮސްޕިޓާތަކާއި ބޭންކާއި ސްކޫލްތަކާއި ކަފިހި ހުރަސްތަކާއި ދުވާރާއި ގޯޅިތަކުގެ ކަންމަތީގައާއި ބޮޑުތަކުރުފާނު މަގުގެ ތާރު އަޅާފައި ހުރި ހިސާބުގައި ޕާކުކުރާ ވެހިކަލްތަކުގައި ސްޓިކާ ޖަހަމުންދާނެކަމަށް ފުލުހުން ވިދާޅުވެއެވެ. މީގެ އިތުރުން ފުލުހުން، ކޯން ނުވަތަ ބެރިކޭޑު ބަހައްޓާފައި ހުންނަ ތަންތަނާއި ޑަބަލް ލައިން ދަމާފައިވާ ސަރަޙައްދުތަކުގައި ޕާކުކުރާ ވެހިކަލްތަކުގައިވެސް ޕާކިން ވައިލޭޝަން ސްޓިކަރ ޖަހަމުން ގެންދާނެކަމަށް ފުލުހުން ވިދާޅުވެއެވެ.
މީގެ އިތުރުން ހެޑްސެޓް ޖަހައިގެން ވެހިކަލް ދުއްވުމާއި، ޗައިލްޑް ސޭފްޓީ ބެލްޓް ނާޅާ ދުއްވުމުގެ މައްސަލަތަކުގެ އިތުރުން ޤަވައިދާ ޚިލާފަށް ނަމްބަރު ޕްލޭޓްޖަހައިގެން ވެހިކަލް ދުއްވުމުގެ ގިނަ މައްސަލަތަކެއް އެ އިދާރާއިންވަނީ ބަލާފައެވެ.