ޓެރަރިޒަމްގެ ކުށުގައި 13 އަހަރަށް ޖަލަށް ލުމަށް ޙުކުމް ކޮށްފައިވާ ކުރީގެ ރައީސް މުޙައްމަދު ނަޝީދުގެ ޝަރީއަތް ކުރިއަށްގެންދިޔަ ގޮތާމެދު ކަންބޮޑުވާ ކަމަށް އދ.ގެ އިންސާނީ ޙައްޤުތަކާބެހޭ ކައުންސިލްގެ ކޮމިޝަނަރ ޒައިދު ރާދް އަލް ހުސެއިން ވިދާޅުވެއްޖެއެވެ.ޖެނީވާގައި ހުންނަ އދ ގެ އިންސާނީ ހައްގުތަކާ ބެހޭ ކައުންސިލުން މިއަދު ނެރުނު ބަޔާނުގައި، ޒައިދު ވިދާޅުވެފައިވަނީ ނަޝީދުގެ ޝަރީއަތް ކުރިއަށް ގެންގޮސްފައިވަނީ އަވަސް އަރުވާލައިގެން ކަމަށާއި، އެއީ ރާއްޖޭގައި އާންމުކޮށް ކަންހިނގާގޮތާ ޚިލާފު އަދި، ބައިނަލްއަގުއާމީ މިންގަނޑުތަކަށް ބަލާއިރުވެސް އިންސާފުވެރި ޝަރީއަތެއް ހިންގުމަށް އެކަށީގެންވާ މުއްދަތެއް ނޫން ކަމަށެވެ.ރާއްޖޭގެ ގާނޫނު އަސާސީގައި ދިފާއުގައި ވަކާލާތު ކުރުމާއި، ދިފާއަށް ތައްޔާރު ވުމަށް ވަގުތު ދިނުމަށް ބަޔާންކޮށްފައިވާކަން ފާހަގަ ކުރައްވަމުން ދައުވާއަށް ތައްޔާރުވުމަށް ދިފާއީ ވަކީލުންގެ ޓީމަށް އިތުރު ވަގުތުދޭން ޖެހޭ ކަމަށް ވިދާޅުވިއެވެ. އަދި މައްސަލަ ބެއްލެވި ބައެއް ފަނޑިޔާރުންނާއި ދައުވާ ހުށަހެޅުއްވި ޕްރޮސެކިއުޓަރ ޖެނެރަލް އެ މައްސަލައިގެ ތަހުގީގަށް ބަޔާންދެއްވުމުން މަސްލަހަތު ވެސް ފުށުއަރާ ފައިވާކަމަށް ޒައިދު ފާހަގަކުރެއްވިއެވެ.މިމައްސަލަ އިސްތިއުނާފުކުރާއިރު، ނަޝީދުގެ ދިފާއުގައި މަސައްކަތްކުރަން އެކަށީގެންވާ ވަގުތާއި ފުރުސަތު ދިނުމަށް ވެސް ޒައިދު ވަނީ ގޮވާލާފައެވެ.އދ ގެ އިންސާނީ ހައްގުތަކާބެހޭ ކައުންސިލްގެ ކޮމިޝަނަރ މިފަދައިން ބަޔާނެއް ނެރުއްވިއިރު، މީގެ ކުރިން ކްރިމިނަލް ކޯޓުން ބުނެފައިވަނީ ނަޝީދުގެ ޝަރީޢަތް ކުރިއަށް ގެންގޮސްފައިވަނީ އެކަށީގެންވާ ވަގުތު ދީގެން ކަމަށާއި، އެގޮތުން މިމައްސަލައާ ގުޅޭ ފައިލްތައް ނަޝީދުގެ ޤާނޫނީ ޓީމުގެ އަތުގައި ހުންނަތާ 3 އަހަރުވެފައިވާކަމަށެވެ. އަދި މިމައްސަލަ ބަލާ ފަނޑިޔާރުންނަކީ މަސްލަހަތު ފުށުއަރާ ފަނޑިޔާރުން ކަމަށް ބެލެވޭނެތަނެއް ނެތްކަމަވެސް ކޯޓުން ވަނީ ބުނެފައެވެ.މީގެއިތުރުން ނަޝީދުގެ ޝަރީޢަތް ކުރިއަށްދިޔައިރު ހުކުމް އިއްވުމާ ހަމައަށްވެސް ދިފާއީ ވަކީލުން އައްޔަން ކުރުމުގެ ފުރުސަތު ރައީސް ނަޝީދަށް ހުޅުވިފައިވާކަންވެސް ކޯޓުންގެންދެވީ ތަކުރާރުކޮށް ވިދާޅުވަމުންނެވެ.